Oipindi yokomudo ya enda nawa mOranjemund

0
151

Oranjemund – Oshivilo shoipindi shokomudo (Diamond Festival) oshititanho osha enda nawa ko doolopa yo kawe Oranjemund.
Oshivilo shoipindi osha hovelele pexulilo lohani yadjako fiyo opehovelo laDesemba 2016. Ovanangeshefa vanini novo pokati ovali vamona omhito va ulike oipindi yavo moauliko oipindi mOranjemund.

Moshipopiwa shae eshi apa tulula oshivilo eshi pambelewa Minista yomauyelele Tjekero Tweya, sha leshwa ponhele yae ku Ngoloneya woshitopolwa sha \\Karas Lucia Basson, okwa tumbula kutya oshivilo shoipindi eshi sha hovela konima yeedula nhano dakapita, osha eta ovanhu pamwe, nosha yeulula omhito yomangeshefo kovanangeshefa vomodoolopa.

Oshivilo sholudi eli osha eta omakwatafano opaipindi, okuulika oilandifomwa noku topolelafana omauyelele a nghene ovanangeshefa tava dulu oku yambulapo eengeshefa davo.

Tweya okwa tumbula kutya odoolopa ya Oranjemund oyali ashike yatungwapo nelalakano lokukwafela ovo tava mhina okawe, ashike konena ota tumbula nomukumo kutya odoolopa oya huma komesho meendelelo.

Ta tumbula kutya omafaneko mahapu ena sha nehumokomesho lo doolopa okweli pyakidilwa nao, ngaashi okuliwe melipyakidilo lokutunga oshipangelo shepangelo, ofikola yepangelo, eembelewa depangelo, omaumbo naikwao ihapu.

Okwa yelifa yoo kutya oshivilo shoipindi iha shi ningwa ashike nelalakano lokulandifa, ndele oha shiningwa yoo nelalakano lokushiivifa nghene odoolopa ya Oranjemund tai wapalele oku pindika.

Moku tambulako ovaenda Meya wodoolopa ya Oranjemund Henry Coetzee moshipopiwa shae sha leshwa ku Kansela melelo lodoolopa ya Oranjemund Toivo Auala okwa tumbula kutya, efimbo eli lo shivilo sho Diamond Festival olo efimbo loku yeulula eemhito domangeshefo mo doolopa ya Oranjemund.

Ta tumbula kutya oshivilo sholudi eli nonande osheya pefimbo leliko liheli nawa, osha dula okunana ovalandifi vahapu, mwa kwatelwa ovanangeshefa vanini novopokati, oshoyo omahangano oo anyama kepangelo.

Coetzee okwa pandula omahangano oshoyo oohandimwe ovo hava yambidida opo oshivilo eshi shidule oku kalako odula keshe. Ta ti oshivilo eshi nande opo ashike sha hovele konima yeedula nhano dakapita, otashi endelele.

Omwaalu wovalandifi novatalelipo otau ende tau i komesho odula keshe, neshongo olo la taalela elelo lodoolopa olo onhele yaandjuka nawa omo ovanangeshefa tava dulu oku ulikila oipindi yavo vamanguluka, nelelo lodoolopa ya Oranjemund olina omafaneko opo li longekide onhele yaandjuka nawa ko Extention 15.

Coetzee okwa tumbula kutya odoolopa ya Oranjemund oili lela moku lundululwa okudja modoolopa yomhina nokuya pomufika welelo lodoolopa ngaashi naana omalelo eedoolopa moshilongo.

 

LEAVE A REPLY

Please enter your comment!
Please enter your name here