Ongonyo yaIndongo inandi yi mona

0
216

Windhoek- Omanga inaa londa mondhila okuya ko Russia, osho wo tuu manga inaa londa moringa yolugodhi enyakwa lyuuyuni mondjundo yo junior welterweight Julius Blue Machine Indongo okwa li ewete esindano lye.

Indongo okwa yugu ko oshishani shomapaya gaali okuza kenyakwa nale mondjundo ndjika yomahangano IBF/IBO Junior Welterweight Eduard Troyanovsky Olyomakaya gayi moshinyanga shasimana moMoscow shedhina Khodynka Ice Palace.
Indongo okwa nyola wo ondjokonona moshimpungu shuudhengingonyo wa Namibia ngele kashi shi muuyuni sho a dhenge omukondjithi gwe ongonyo yapama yolumoho noku mu langeka pevi meni lyoosekonde 40 medhingoloko lyotango lyolugodhi lwomadhingoloko 12.

Mokuninga ngaaka ye okwa eta olugodhi ndoka pehulilo, nongeyi okwa halutha noku mweneka engathithi enene lyaayambidhidhi ya Troyanovsky mboka yi ile okutala nkene enyakwa nale tali gamene iishani yalyo.

Konima yolugodhi enyakwa nale ndyoka lya zimine kutya inali mona nkene ongonyo ndjoka yu umbwa, sho lyi iyadha lya lala ongali olya ti, “Kandi uviteko nkene sha ningwa. Kandina esiku nda talele omathano gomalugodhi ge. Onkene itandi vulu kutya onda li nde mu dhina molugodhi nduka. Inandi mona ashike ongonyo ndjoka sho yu umbwa. Ondi shishi kutya iishani yandje oya ya, ihe ondi na einekelo kutya otandi keyi galulako molugodhi lwe tsakaneno ishewe.”

Troyanovsky konima yolugodhi okwa hokololwa a falwa koshipangelo a ka konakonwe ngele pamwe okwa shukuka momutse nenge pamwe omasipa ge gaampoka pwa kwatwa kongonyo ya Indongo ogi inyenga nando okuli. Ihe otaku hokololwa kutya ayihe kolutu lwe oyili nawa na okwa lalekwa a shune kegumbo.

Indongo sho a popitha aatoolinkundana pehala lyoondya lya Nice Restaurant moWindhoek oshiwike shika okwa ti sho a yi koRussia kolugodhi ye kali ena uumbanda washa kutya osho shotango ta ka kondja pondje yoongamba dha Namibia. Oshikwawo kali ena omaipulo kutya enyakwa nale ota adha li mu nine shike mombalukutu yalyo yoongonyo. Ihe ye okwa li uuvite ombepo ye tayi mu lombwele kutya ye ota ka kuthako iishani mbyoka iyali kenyakwa ndyoka omvalele ya Russia.

“Noludhi lwomadhewo ngoka hatu longitha moku ilongekidhila olugodhi pamwe nooyakwetu ,mboka ya kwathele ndje meilongekidho ndika , onda kala ndina einekelo kutya molugodhi nduka otamu kaza sha oshindji.Otandi pandula wo unene aadheuli yandje, Imms Moses, Joe Hantindi na Siegfried SBK Kaperu, aamentu mbano oya soshimpwiyu opo ndika kale nda ndjanga nonda nukapo” osho Indongo a ti ngoka a kala wo ti idheula pamwe na Paulus ‘The Hitman’ Moses, Mendu Kaangundue na Mike Shonena.

Sho a popi poshigongi osho tuu shika omuwiliki moonzo dhopantu moMTC Tim Ekandjo okwa ti Indongo ita thiminikwa oku kondja ishewe na Troyanovsky oshoka meuvathano lyawo kamuna okatendo hoka taka ti ngoka a dhengwa kumukwawo otaka pewa ompito yokushunithamo olugodhi ndoka opo a kambadhale oku galulako omapapa ge.

“Pethimbo ndika tse otwa hala ashike okutyapula enyakwa lyetu epe lyuuyuni mokudhenga oongonyo. Utya esindano ndika olyo, omagano goKilisimesa kaaNamibia ayehe.Otwa tegamena oku dheula omanyakwa ogendji guuyuni monakuyiwa. Ndele pethimbo ndika natu tyapuleni esindano ndika,” Ekandjo a ti paufupi.

Omulongekidhi gwomalugodhi nomuwiliki gwo academy ya Sunshine Boxing academy Nestor Tobias kombinga ye okwa ti esindano tali nyanyudha lyomOlyomakaya lyenyakwa epe lyuuyuni Indongo olye ya po sha ziilile miilonga yeitulemo noyuudhiginini osho wo yomunwe gwa Midas, ngoka pamahokolo alihe a lundululile kehe shoka a gumu shi ninge oshingoli.Tobias okwi iyeleke na Midas Omukwaniilwa omuGreka, oshoka uuna ye a dheula omudhengingonyo olundji ngoka oha ningi enyakwa.

Nguka ina halutha noku mweneka ashike ongundu onene yaa Russia Olyomakaya gayi ihe okwa dhengemo wo Troyanovsky meni lyethimbo efupi. Indongo, ngoka eli ponomola ontiyali muuyuni mondjundo ndjika ngashingeyi okwa kondja omalugodhi 21 ngoka a sindana agehe. Oye wo enyakwa lyuuyuni etine lyaNamibia a landula moompadhi dhomanyakwa goo Harry ‘The Terminator’ Simon, Paulus ‘The Hitman’ Moses osho wo nee Paulus ‘The Rock’ Ambunda.

LEAVE A REPLY

Please enter your comment!
Please enter your name here