Shikongo a taambwako nomaako agehe mOkankolo

0
179

ONDANGWA – Omutondoki nenyakwa muudhano wOlympika yaanuulema a tseyika nawa moshilongo Ananias Shikongo okwa talelepo oshikandjohogololo shaandjawo Olyomakaya gapiti.

Etalelopo lye lyopambelewa olya ningililwe pombelewa yoshikandjohogololo shaandjawo pOkankolo.
Engathithi lyaakwashigwana pamwe naaleli yoondondo dha yooloka moshilongo oya li ya gongala mpoka, opo ya tsakaneke noku taambako omusindani gwombandi yoshingoli nguka. Shikongo okwa sindana omapapa mokutondoka pethimbo lyuudhano waamatuki yena uulema nenge Paralympic mo Rio de Janeiro sha Brazil mu Septemba nuumvo.

Nonande ena uulema womeho Shikongo okwa li a thiki gwotango nokwa kangele ayehe mboka yali ya kutha ombinga, naashika oshe mu pethitha omedalia yoshingoli.

Omolwa omasindano ngaka Shikongo pamwe nomumatuki omukwawo osho wo ookuume ke oya longekidha olweendo lwowina, opo a thindikile ekopi noombandi ndhoka dhika monike kegumbo osho wo komandengu gomuuzilo ngoka haga tema omulilo ngoka gwe mu pe omuyenye a kale a yenya sho ta matuka mobaana yoParalympika.

Ngoloneya goshitopolwa Oshikoto Henock Kankoshi ngono naye opo a li poshiithanene okwa pandula Shikongo sho a mono sho opala opo a kale ta kutha ombinga momathigathano nga ngaka.

Kankoshi okwa kumike Shikongo, a tsikile nuudhano we opo epandela lyoshilongo li kale wo ta li yeluthwa noku pepa nawa muuyuni pethimbo lyuudhano.

Aavali naamwayina oyali ya nyanyukwa moku tala omwana sho a longa iilonga pondoli mbyoka ya simana moshigwana.
Shikongo ye mwene okwa popi kutya kashishi oshipu okukutha ombinga momathigathano gafa ngaka , ashike ye ongomuntu ena oonkondo nomukumo okwe shi pondola, ta ti sho a ulikwa oye omusindana oshali she mu nyanyudha noonkondo.

Okwa tseyitha wo kutya okuna omaudhano ogendji a taalela momumvo 2017, ngono taka kala a kutha ombinga kondje yoshilongo, nota kala a thindikilwa kongundu ye ndjoka hayi mu yambidhidha.

“Ondina etsomukumo kaanuulema ooyakwetu, mboka haya kala inaa ya hala okukutha ombinga momaudhano, uudhano ohawu kwatha omuntu a dhiladhile nawa, noku tunga woo olutu,” Shikongo ta gwedhapo.

Okwa tsikileko ta kumike aanuulema ya kale haya kutha ombinga momaudhano ga yooloka, yo ya tseye kutya uulema itashi ti ito vulu okukutha ombinga mosha.

Okwa endulula kutya oku na omaudhano ogendji mono yo taya vulu okunyanyukilwa pamwe na yakwawo.

LEAVE A REPLY

Please enter your comment!
Please enter your name here