A si sho a lika keyoka lyontoka

0
480

ONGWEDIVA – Omukulupe gwoomvula 66, okwa si eso lyombaadhilila sho a lika keyoka lyontoka.
Sho tashi kumitha aapambele yakuku Lea Sakeus, ooshoka omukulupe nguka a likila megumbo lye, omanga omayoka goontoka anuwa ina ga konekelwa naanaa haga yi momagumbo.

Ishewe, kongulohi yesiku ndjoka kuku Lea a hulitha, megumbo omo tuu moka omwa li mwi itsuwa okayoka natango okashona taku fekelwa kutya okantokwena.

Oshiningwanima shika osha ningilwa momomukunda Oniiyagaya moshikandjohogololo Okankolo, mEtitatu lyoshiwike sha zi ko, lwopo 14h30. “Nande aantu otaya popi iinima oyindji yindji shina sha noshinima shika, ngame mwene ondi wete kutya ndika eyoka owala ngaashi omayoka omakwao, nande tali kumitha shaashino anuwa oontoka iha dhi hale naanaa okuya momagumbo. Walye kutya megumbo oya yi mo ngiini, nota yi kongo shike, nenge pamwe ohayi ya mo shito katu shishi, ashike ondiitaala kutya ndika eyoka owala lyaKalungu,” Mateus Kashika, omwana gwosheeli gwanakusa a ti.

Kashika okwa hokolola kutya yina naanegumbo lye oya li taya kambadhala okudhipaga eyoka, ndyoka lya li lya adhika kondunda yokupungula, kukamwe komaanona yomegumbo.

Eyoka ndika anuwa olya yi meyemele ndyoka lya li mondunda moka, na kuku Lea okwa kambadhala andola a tengule eyemele ndyoka noshiti opo andola eyoka li ze mo ye a vule oku li dhenga.

Eyoka sho lya zi mo meyemele olyiipumpu momagulu gomukulupe nguka, nomunegumbo gumwe ishewe, ashike konima okwe shi pondola okuli dhipaga.

Konima sho lya si, omukulupe okwa tameke ta ti okwa fa uvite uuyehame pompando, ti ipula pamwe okwa lika keyoka.
Aanegumbo oya ithana aashiinda, mboka ye mu pe omuti noku mu fala koshipangelo kOkankolo. Manga taya ende mondjila, aashiinda mbaka oya mono kutya kuku Lea okwali ta kanitha oonkondo. Sho ya thiki okwa pewa ekwatho lyotango kaapangi, andola a tegelele oambulansa yi mu fale koshipangelo kOnandjokwe.

Omupya munene shika ina shi ka ningwa we oshoka omukulupe nguka okwa hulitha po 16h45, omanga oambulansa inaa yi thika.
Mateus ta ti uusiku wesiku ndyoka, sho ya yi kegumbo, lwopo 00h00, okwiitsu ishewe okayoka okakwo, eka adha mondunda ye yokulala. Oye ka dhipaga na sho ka konaakonwa nawa, okwa monika wo kutya okayoka hoka nako ontoka.
Aakwanezimo mbaka oya ithana aanambelewa ya natiili mboka yeya lombwele opo ya fike po omayoka ngoka.
Kuku Lea okwa fumbikwa Etitatu lyoshiwike shika.

LEAVE A REPLY

Please enter your comment!
Please enter your name here