Tusk Mobile a patulula oshitayi moRundu

0
161

RUNDU – Meya gwondoolopa yaRundu okwa ti omiyelo dhoshilando shoka odha egulukila aanangeshefa ayehe mboka yena ohokwe moku kuthombinga meyambulepo lyayo.

Verna Sinimbo okwa popi ndhika pethimbo lyepatululo lyoshitayi ngeshefa shoTusk Mobile and Electronics moshilando shoka ehulilo shiwike lya piti.

Sinimbo okwa kumike aakalimo yomondoolopa moka ya kuthe ombinga moku humitha komeho ondoolopa ndjoka noku tunga omudhingoloko tagu hokitha.

Okwa ti uuna aanangeshefa taya pungula moondoolopa dhomoshilongo , otaya eta noku fala omayakulo gili ili no gi ili koshigwana osho wo okuetapo oompito dhiilonga.

Sinimbo okwa gwedha ko ishewe a ti okupungula noku tunga oongeshefa otaku dhi kokeke opo aaNamibia, ya kale taya longo nokunduluka iilongomwa yawo yene, yo taya kwashilipaleke kutya oshilongo osha hedhithwa komeho paliko, sho shi kale shina aantu ayehe konyala taya longo noku imonena iiyemo..

Ehulilo shiwike lya piti olya eta ondjokonona moshilongo sho kiitayi ngeshefa yoTusk Mobile & Electronics kwa gwedhwa oshitayi oshipe. Odshitayi shika osha patululwa olyomakaya ga piti sha ningi;wa moRundu moshitopolwa shaKavango East.

Sinimbo okwa pandula aakuluntu wiliki yiitayi ngeshefa mbika, ta ti otaya longo nuudhiginini moku yambulapo oondoolopa dhawo , dho dhi kale tadhi imonikila. Okwa ti shino osho esindano enene mokutala aanangeshefa yomoshilongo taya eta omayakulo miitopolwa ya yooloka.

Martin Kaali Shipanga omukuluntu wiliki gwehangano Shipanga Holdings moka omo mwa kwatelwa iitayi ngeshefa yo Tusk Mobile & Electronics okwa ti oshitayi shika shomoRundu oshiti-24 moshilongo ashihe.

Shipanga okwa ti oku uvite etumba okukala oshitopolwa shoongeshefa nomayambulepo gondoolopa yaRundu. Okwa endulula kutya oshinakugwanithwa shaaNamibia yoyene opo ya kwashilipaleke kutya oya fala omayakulo koshigwana, yo iilonga mbyoka taya longo moshigwana yi kale tayi imonikila.

“Iitayi ngeshefa yoTusk mobile otayi adhika konyala oondoolopa adhihe moshilongo, moka hatu landitha omalusheno, ethimbo lyokongodhi, , oongodhi dhopeke, omathano, oowili, no sho wo hatu landitha iilongomwa yomalusheno yongushu,” Shipanga ta ti.

Okwa gwedhapo kutya otaya lalakanene okukandulapo onkalo yoluhepo naandjoka yokwaana iilonga moshilongo. Moshitayi shoka oshipe otamu adhika aaniilonga yatatu pethimbo ndika, nomukuluntuwiliki okwa yelitha kutya oshitayi sho tashi koko otaya kala ya gwedhako komwaalu gwaaniilonga yo ya kandulile onkalo yokwaana iilonga kokule.

 

LEAVE A REPLY

Please enter your comment!
Please enter your name here