Aaniipa nayo ya kuthako oongaku

0
138

ONIIPA – Omolwa iiyagaka ya napakana nondoolopa yOniipa, elelo lyondoolopa pamwe nombelewa ya kansela oya longekidhile oshikonga shokwoopaleka oshiwike shotango shomwedhi nguka. Elalakano lyoshikonga shika okukaleka po uuyogoki.

Aakalimo yomondoolopa oya li ya mono elombwelo opo ya opaleke omidhingoloko dhawo dhi kale tadhi imonikila, shika osha ningwa ashike oomwedhi dhimwe konima sho Oniipa ya ulikwa yi kale ondoolopa yi ithikamena.

Omunambelewa guundjolowele mondoolopa ndjoka Daniel Nicodemus okwa ti oya tothamo esiku lyowina opo ya opaleke ondoolopa yawo, ndjoka ya luudha noonkondo.

“Meopaleko lyetu otwali tuna aanambelewa yelelo lyondoolopa, aagundjuka, aaleli yopamuthigululwakalo, aaleli yongeleka , aanona yosikola, aapangi nosho wo oondohotola, eopaleko ndika nande tweli ningi oshikando shotango olya enda nawa noonkondo, oshoka aakalimo yomondoolopa oyendji oya kutha ombinga moku opaleka omidhingoloko dhawo,” Nikodemus a ti.

Oshikonga shika shoku opaleka osha ningwa kohi yoshipalanyolo “ Ehala lyetu, Oshikandjohogololo shetu, Oshinakugwanithwa shetu. Nikodemus ta tsikileko ta ti uuna omudhingoloko gwa yela ohagu eta oshigwana shi kale shina uuyogoki nuundjolowele.

Okwa ti oya hala ondoolopa yOniipa yi kale tayi imonikila mokati koondoolopa oonkwawo moshilongo, opo nenge aatalelipo taya endemo ya kale ya hokwamo. Okwa ti ohashi sitha uunye nohoni okutala omahala gamwe mondoolopa yawo ga kaka noonkondo.
Nikodemus okwa ti oya thaneka opo ya kale aluhe taya opaleke ondoolopa yawo yi kale ya yela. Okwa holola wo kutya aagundjuka mondoolopa oya uvaneke taya kala haya kutha ombinga miikonga yokwoopaleka ethimbo kehe, yo iiyagaya ayihe yi kale ya yelamo thilu mondoolopa.

Oshikonga shika shokwoopaleka oshali sha tameke ethimbo lyongulonene sigo ethimbo lyomutenya, Nikodemus okwa pandula ayehe mboka ya wayimine elelo lyondoolopa meopaleko ndika, ta kumike woo yalwe ya kale taya opaleke omidhingoloko dhawo. Okwa pandula aanangeshefa yomomudhingoloko mboka yi iyamba okugandja sha shoka sha kwathele mboka yali taya opaleke ondoolopa ndjoka.

LEAVE A REPLY

Please enter your comment!
Please enter your name here