NEEEF molupe lwongashingeyi ita yambula po oohepele

0
104

Oku tala komahangano ngoka ga ulikwa nale ogo ga longele kumwe shina sha netulo miilonga lyomulandu gwo ku etapo uuthike pamwe pamahupilo nenge [New Equitable Economic Empowerment Framework- NEEEF] , ontotwampango ndjika itayi yambula po oohepele ndhoka odho dha pumbwa oku kuthwa moluhepo kuyo.

NEEEF okwa ngongwapo ongo omulandu gu li kombanda ngoka gwa kwatelamo oongudhi dhenkondopeko tagu lalakanene okufala komeho osho wo oku unganeka omilandu adhihe dhepangelo dhina sha noku nkondopeka pamahupilo.

Ontotwampango ndjika oya thaneka okutungulula omahangano noongeshefa dhopaumwene [dhaatiligane] moku dhi thiminika paveta opo dhi gandje ooperesenda 25 dhuumwene wadho kaantu mboka ya kala nale konima yesiga pamahupilo.

“Kandi wete NEEEF ta ka longa muuwanawa waamboka yongundu yopokati nenge yongundu yaamboka yena iiyemo yi li pevi.Opena nale omahangano gamwe ngoka ga tothamo omahangano gaaluudhe ga nkondopekwa pamahupilo opo ga longele kumwe naangaka moshinima shika. Go omahangano ngaka itaga vulu okutalikako ongo gaantu mboka yii yemo yopokati nenge gaamboka yena iiyemo yopevi. Aantu oya pumbwa okulonga nuudhiginini noku ethapo okutegelela ya pewe peke. Namibia okuna okulonga noku etapo oshindji opo a vule oku holola po oompito dhiilonga noku ndjekapo oondjambi. Pethimbo olyo tuu ndyoka uunongo nontseyo yiilonga oya pumbwa okuhwepopekwa. Omulandu gwelongo gwetu ogwa pumbwa okulundululwa. Ndjika oyo ayike ondjila ndjoka tayi vulu okuthitika omwaka gokwaathike pamwe” Osho Purvance Heuer Omuwiliki Gwomapekapeko mehangano lya Simonis Storm Securities a ti.

Oongeshefa dhilwe dhopaumwene ngaashi Capricorn, odha tindi okugandja shoka dhi uvite kombinga ndjika, moshinima shaNEEEF. Capricorn kombinga ye okwa ti yo itaya ti ko sha kepulo ndika oshoka oya gandja nale osheetwapo shawo mwaashika kOmbelewa yOminista Onkuluntu.

Kuyele omwedhi nguka Kundana okwa kundanekele kutya Ominista Onkuluntu nale Nahas Angula oya ti itashi kala pauyuki oku pula aatiligane oyo ayeke ya gandje po ooperesenda 25 dhoongeshefa dhawo omanga pena aanangeshefa aaluudhe mboka wo ya mona omauwanawa okuza nkene oshilongo sha manguluka naambaka oyena okupulwa opo ya topole uuyamba wawo naaNamibia ooyakwawo mboka ya kala konima yesiga.

“ Itandi ya tumbula komadhina ndele opena aaluudhe mboka ya likola oshindji , onkene kashili pauyuki kombinga yaa tiligane oyo ayeke ya gandje po ooperesenda 25 dhoongeshefa dhawo” Angula a ulike.

Angula okwa ti osha pumbiwa opo NEEEF ngoka a li ngongwapo pethimbo ye a li Ominista Onkuluntu opo a talululwe opo ku etwe efatululo lyomondjila lyaamboka ya talikako ya li konima yesiga pamahupilo,molwashoka onkalo yopamahupilo nonkalathano oya lunduluka.

“ Iinima oya lunduluka ngaashi, oshiholelwa ngele owa tala kungame, otandi vulu okutya ondili konima yesiga omolwomimvo dhandje. Osha pumbiwa okutalulula omulandu. Opuna ompumbwe okutala oondjila dhilwe ndhoka tadhi vulu okulandulwa molwashoka ethimbo olya pita.” Angula a ti noku ulika kutya NEEEF okuna oongudhi odhindji ndele osha fa aantu taya dhenge ashike omuthindo koshinima shuuthike pamwe.

Kuyele omwedhi gwayi Omunashipundi sho Law Reform and Development Commission Yvonne Dausab okwa tile okugandja oopersenda 25 ku NEEEF otaku vulu okutalululwa.

Oshifo sho The Nambian osha kundanekele pethimbo lyoshigongi shokupungula moNamibia kutya Dausab okwa li a ti oveta ndjika otayi vulu oku opalekwa.

“NEEEF ota talululwa. Ngele opena iinima yontumba nenge omaipumomumwe, opena aluhe ompito yoku yi hwepopeka , ndele otandi dhiladhila kutya omadhiladhilo agehe ngoka ga gandjwa otaga talika” Dausab a uvaneke.

Pethimbo lyoonkundathana naanangeshefa kombinga yo NEEEF mu Juni nuumvo aanangeshefa yamwe oya thanekele kutya iipumbiwa yimwe moveta ndjika nayi kale itaayi dhengele ndele aanangeshefa ya pewe ompito yoku hogolola shoka yo taya vulu okulonga kombinga yaambika. Oongudhi ndhika tadhi dhengele odha kwatelamo uumwene wopamahupilo, ewiliko lyongeshefa osho wo uuthike pamwe miilonga.

Aakuthimbinga moshigongi shopashigwana oya li yu ulike okwaana ombili kwawo kombinga yoshinima shuumwene wongeshefa shoka tashi pula ooperesenda 25 dhi gandjwe kwaamboka ya li konima yesiga.Noshikwawo kutya ongeshefa ndjoka ya gandja ooperesenda odhindji kaaluudhe otayi ka mona iitsa oyindji moku shi ninga.

Aanangeshefa oya li wo ya popi kombinga yuunongo wiilonga nontseyo nenge ehumithokomeho montseyo yaaniiilonga unene tuu elombwelo kutya ehangano nenge ongeshefa oyi na okulongitha ooperesenda 0.5 dhiiyemo yayo ayihe mokudheula aaniilonga yayo .

Oongeshefa odha nyenyeta kutya opena ompumbwe yaa nawino moshilongo okudheula aaniilonga, noshikwawo oongeshefa odha ti odha thiminikwa oku eta mo aanawino ya za pondje opo ye ya longe aaniilonga noku ya pa owino. Oongudhi dhimwe dha NEEEF odha kwatelamo ehumithokomeho lyuunangeshefa, okulanditha nenge okutseyitha iilongomwa osho wo oshinakugwanithwa shopankalathano, okungushupaleka iilongomwa, uuteknologi, omapungulo, osho wo okufutila elunduluko ndika .

LEAVE A REPLY

Please enter your comment!
Please enter your name here