Oalbuma yaSnouu ombwaanawa nethimbo ndika

0
136

Windhoek- Omuimbi gwoongalo dhoAfro Pop noKwaito, Joseph Mundilo, a tseyika nawa “Snouu” okwa nyanyukilwa oalubuma ye ndjoka ompeempeka yedhina Iita, onga yimwe yomooalubuma ndhoka dha tengenekwa dhika ka kale dha mwenyeka nawa pethimbo ndika lyomatango omanene.

Omvalele yomonooli momukunda Ondeihaluka, oya pititha oshipandi shoongalo dhayo ndhoka dha dhenga mbanda omasiku gapiti, nongashingeyi ndhika otadhi inyenge nawa, dho tadhi lilithwa opendji konyala oshilongo ashihe.

Snouu ota ti oongalo dhe odhi ikolelela kehuku lyontumba ndyoka hadhiladhila ethimbo ndyoka opo a tameke okunyola omaimbilo ge nawa. Moalubuma otamu adhika ongalo ngaashi ndjoka yili ponomola onti-10 “Let the kids play” tayi ti Etha Uunona Wu dhane, yo Afro pop, ya ningilwa omikwelengendjo ku Elvo yo ndjika oyo yimwe yi holike unene.

Ongalo ndjika otayi popi nkene aantu haya ningi uunona nayi, nenge onyanya, no tayi kumagidha opo aantu ayehe yakale yehole aanona oshoka oyo aaleli yokomongula.

Ongalo “Iimaliwa” moka ta kwathelwa ku Exit nayo ya ningilwa omikwelengendjo kuElvo oyo yimwe yomoongalo dhoKwaito ndjoka tayi popi kombinga yesimano lyoshimaliwa, nankene shina okukwatwa nawa.

Omuna ishewe ongalo ndjoka yalukilwa edhina lyoalubuma “Iita” ndjoka tayi popi kombinga yonkalamweyo nekondjitho lyoluhepo.
Snouu okwa ti ohokwe yoongalo muye oyali ya holoka sho ali a kala momuhandjo gwosikola yaanona yedhina Peoples Primary School (PPS) nomosekundosikola yOtjikoto. “Ethimbo ndiyaka ngele ito lesha, oho kala ashike to ndaanisa nenge to pulakene koongalo dhomoshilongo,” Snouu ta ti ngaaka.

Nonando ongaaka, Snoou okwa ti ondjokonona ye ka yali ompu nenge ombwaanawa, ashike okwa kala noku kondjitha, nonando a kala ena ookume nezimo lye tali mu kwathele ngaaka. “Ngashingeyi ongame nguka te ningi omaimbilo gandje, nondi wete nda hogolola oshinima oshiwanawa naashoka ndi hole,” Snouu ta ti.

Okwa gwedhapo ta ti oha kambadhala okuninga oongalo ndhoka dha dhenga mbanda, naashika oshe mu etele opo a tameke noku longa noonkulungu miikwelengendjo ngaashi Elvo Diergaardt gwoLash Attractions, Nel D gwoDee-Style Records naKanibal. Okavidio kokangalo ke Etha Uunona wu dhane okapita nota ka inyenge nawa komapandja go intanena, nokooTiivii dhomoshilongo.

LEAVE A REPLY

Please enter your comment!
Please enter your name here