Aakiintu taya tsuwa omukumo opo ya nyole iilongithomwa yopalongo yoosikola niiputudhilo yopombanda

0
348

OSWAKOPMUND – Aakiintu AaNamibia oyali ya tsuwa omukumo opo ya tameke okunyola uunamambo nokutota po iikwathitholongo yoosikola nosho tuu yiiputudhilo yopombanda moNamibia. Meme Hellen Ndeshi Namhila omulongi gwoongulumambo ye omunyoli gwomambo,  okwa holola oku uva nayi kwe molwa ompumbwe yuunamambo  moosikola wuna iinyolomwa ya pamba omudhingoloko. Shika okwe shi popi pethimbo lyehulitho lyomutumba omunene gwaakiintu gwa ningilwe moSwakopmund.

Namhila okwa ti kutya ethimbo olya thika opo aakiintu ya tameke oku eta po iikwathitholongo mbyoka tayi vulu oku longithwa moosikola opo aanona AaNamibia ya longwe ondjokonona yoshilongo shawo. Ndika olyo ethimbo aanona yetu ya tseye ondjokonona yetu yene moosikola pehala lyoondjokonona dhiilongo yilwe. Namhila oye wo omunyoli gwomambo gaali ga tseyika nawa “Price of Freedom” (Ondjambi yemanguluko) na “Tears of Courage” (Omahodhi gomukumo), nokwa ti ngashingeyi okwi ipyakidhila nokunyola embo limwe ishewe kombinga yomukondjelimanguluko omuNamibia.

“Konima yoomvula 23 dhemanguluko, AaNamibia oya tsikila nokulesha ondjokonona yaNamibia momambo ga nyolelwa kiilongo yopondje. Omolwashike itatu nyola ondjokonona yetu yene e tatu hokolola omahokololo getu yene momalaka getu pehala lyomahokololo getu taga hokololwa ku yalwe”, osho a ti ye ta gwedha ko kutya iiputudhilo yelongo moNamibia otayi longitha uunamambo wu vulithe poopelesenda 90 mboka wa nyolwa pondje yaNamibia, na shika osha kwatela mo omambo guudhindoli nondjokonona yaNamibia.

Okwa ndhindhilike kutya uunamambo wondjokonona yaNamibia mboka wa nyolwa kondje yoshilongo owuna omawuyelele omashona kombinga yekondjelo manguluko lyaNamibia. “Momambo gondjokonona tatu lesha nena, ongundu SWAPO oya nyolwa mo ashike mokatendo kamwe. Muunamambo mboka , aakiintu AaNamibia nAafrika koonono oya nyolwa mo onga etipo yaanona, ya monithwa iihuna, ya hepekwa, okupopya po ashike yimwe, ndele itatu nyola ondjokonona yetu yene e tatu lombwele aanona yetu ngaashi osho shi li”, osho a fatulula.

Namhila ngoka a tsu omukumo aakiintu ya nyole omahokololo gawo yene okwa ti, otaka gandja omapukululo oshali ku mboka ye na ohokwe yokunyola, ga nkene u na okunyola omambo.

LEAVE A REPLY

Please enter your comment!
Please enter your name here