Chakalas a hala a ninge eeyooloko

0
262
Omwiimbi gwoReggae , Tshigwedha“Chakalas” Pius e li omutumba pondingosho ndjoka e hole mOshakati pethimbo lyoonkundathana naKundana

OSHAKATI – Omwiimbi omugundjuka gwoondjimbo dhoReggae mOshakati, Tshigwedha ‘Chakalas’ Pius okwa eta po Ehangano lye lyoku tota omayimbilo hali ithanwa ‘Disability Movement Production’ nokwiineekela kutya ye ngaashi omwiimbi, ota ka kala ekwatho enene.

Nonando kutya okwa valelwe nuulema kolutu, Chakalas okwi ineekela kutya ota gandja omukumo kaantu oyendji okupitila moongowela nomomusika.

“Uulema wandje itawu ka ninga nando eyipopilo ngele itandi ningi shoka ndi hole. Omusika oyo iikulya yandje, onda hala oongowela dhandje dhi ete mo elunduluko momutima gwomuntu osho wo tuu nda hala aanuulema yamwe ya mone omukumo,” Chakalas osho a ti.

Chakalas otati, oompito dhoku imba okwali hedhi mono okupitila momuntu gumwe ha longele Ehangano lyopashigwana lyAanuulema, a kala ha dhanene mo aanuulema.Ashike okumona oompito ndhoka kuye mwene ngashingeyi, oshidhigu.

“Onda kambadhala olwindji, omathimbo gamwe otandi gandja omayalulilo gandje ano ookwoteishina kehe pamwe. Ashike aantu otaya ti ashike ngame oshilema, itaya kutha ndje po. Aalongekidhi yiituthi iinene, uuna tashi ya pokudhana, ohaya tala ashike kaahikingalo mboka ya tseyika nawa. Ashike onda hala ye tu pe ompito, opo tu imbe tse tu tseyike wo,”osho a ti.

Chakalas okwa imba uungalo 15 na otati uudhigu uunene a taalela esiku kehe owoshimaliwa na itawu ningi uupu nando.

“Onda hala okumana oalubuma yandje ngame ndi yi pitithe ashike, kandina oshimaliwa. Onda hala wo okuya kOvenduka ndika kwatithe uungalo moositudio oohwepo, ashike shoka otashi ka ningwa owala uuna nda mona aayambidhidhi,”  Chakalas tati.

KuSelma Neshiko

LEAVE A REPLY

Please enter your comment!
Please enter your name here