Kombat Okwa Tegelela Okuyumuka Po

0
303
Okuyuulilwa kOmina yaKombat komeya gokohi yevi okwa etitha epato lyayo.

KOMBAT – Kombat okwa tegelela natango esiku moka ta ka penduka po ongondoolopa yi na omwenyo ngaashi ya kala nale omanga omumvo 2007 sho omina ndjika yongopolo inayi pata.  Pethimbo ndika ondoolopa oyi li pokuninga ngashingeyi ombuga nenge eputu, naaniilonga yomomina ndjika ngashingeyi oya ninga aaniilonga yopakathimbo moofaalama dhomomudhingoloko.  Kakele kaasho, etegameno opo li opo esiku limwe omina ndjika yongopolo opo yi ka patuluke ishewe.

Aakalimo oyendji mboka ye na iilonga mondoolopa ndjika oya thikama po naanambelewa yopolisi posasiyona yopolisi, aapangi pokaklinika, aanambelewa mopoosa oshowo aalongisikola yamwe mboka haya longo poprimasikola yomina ndjoka ngashingeyi tayi wilikwa kepangelo. Kombat oyi li pokati kOtavi noGrootfontein.

Iikunino nomahala gomainyanyudho ngaashi uupale wokatanga kokoompadhi, otenisa, okatanga kokomake (rugby) oshowo  ondama yokuyoga (swimming pool) mbyoka ya kala hayi longithwa kaaniilonga yomomina pomasiku ngeyaka ga li omawanawa ngashingeyi oya ninga awike omaputu.

Omunambelewa omukuluntu e nasha niilonga, Janna Lusse, okwa kundaneke oNew Era kutya epato lyomina olya etitha ekanitho kaaniilonga yomonima ye li 270 lwaampoka. “Kombat okwa li a tembudhile aaniilonga ye koomina dhilwe momumvo 2007, nokwa yi monkalo yokukaleka po oKombat mpaka. Ngashingeyi otu na ashike aantu ye li 13. Otwa kambadhala okukaleka omina monkalo yi li nawa ngaashi tashi vulika nokushilipaleka kutya aakwashigwana itaya yonagula omaliko gwomina,” osho omunambelewa nguka ta ti.

Ota ti aantu yamwe ohaya lumbu nokukala  momagumbo gwomina  itaa ya futu sha, molwaashoka  itaya vulu okufuta  oshoka kaye na iilonga. “Aantu ohaya futu N$300 lwaampoka okukala momagumbo ngoka longwa (niitungitho kaa yi shi oondhopi), omanga mboka yomomagumbo gwomakuma (oondhopi) haya futu konyala N$1000.  Egumbo kehe oli na okaketha kalyo kolusheno, nomeya ohaya longitha ashike oshali – ano ihaga futwa. Momagumbo gamwe otwa teta ko omalusheno, oshoka osho awike tatu vulu okuninga po,” osho ta ti.

“Aantu otaya konkola esiku nesiku pombelewa yandje,  taya kongo omauyelele kutya uunake iilonga tashi vulika yi tameke. Pethimbo ndika ondi na omaindilo giilonga 1200 lwaampoka,” osho Lusse ta ti.  “Ngame ondi ilongekidha okukala muka. “Ndjika oyo onkalamwenyo yandje, oshoka onda kala muka okuza momumvo1972, nomo nda monena ondjapo yandje yiilonga yomina,” osho Lusse ta ti. Edhiladhilo  okulanditha po oKombat okuza kehangano lyaCanada lyedhina Weatherly, okapandi koodola oomiliyuna ndatu miimaliwa yaAmerika (U$3 million). Omina okwa li ya adhika  wo komeya momumvo 2007, pethimbo limwe konyala awike sho ehangano Weatherly International kwa li lya pata oomina dhalyo dhilwe dhongopolo moshilongo, shoka sha etitha opo yi kale awike metonatelo, nonkalo ndjika okwa li ya etithwa komaupyakadhi gopaigwana ge nasha nemona pethimbo ndyoka. Oondando dhongopolo odha gu pevi pamwe niimaliwa yiilonga okulonga moomina oya londo yi vulithe ondando yokulanditha (ongopolo) motona (per tonnage).

Ooyene yomina ngashingeyi, Kombat Copper Inc, oya tseyitha momwedhi Kotoba omvula ya zi ko kutya oya tameka nondondo yotango yoproholoma yawo yi nasha niilonga yokawe poKombat Cooper Project. Iilambo itano yuule woometa 858.72 oya pwa okumboolwa, omanga iilambo iyali ya li natango pokumboolwa pethimbo ndyoka.

Ehangano okwa li ishewe lya popi pethimbo ndyoka kutya ngele iilambo ayihe kumwe iheyali oya pu okumboolwa, oomboola otadhi ka tembudhilwa komahala galwe gomuule lela moprojeka ndjika. Ehangano olya ti kutya elalakano lyiilambo mbyoka yotango okukoleka ekalapo lyiikwamina mbyoka ya tothwa mo pamikanda dhondjokonona poKombat.

Menindjela gwiilonga yomina ota ti iilonga yomakonakono nenge omapekapeko ngoka oya pwa nale. Iilonga yomapekapeko ngoka ga ningwa muMaalitsa nuumvo oya etitha wo onkundana ombwaanawa kaakalimo yomoKombat mboka ya tegelela okumona oompito dhiilonga.

“Iizemo yoproholama ndjika yokumboola otayi etitha omukumo,  kutya pehala mpoka itapu monika awike ongopolo, tapu adhika wo iikwamina yilwe ngaashi – oholo (lead), zinc oshowo oshisiliveri (silver). Pamwe nondungethaneko yomina oshowo olisinisa ndjoka ya pewa Gross Otavi, otu na etegameno kutya omu na iikwamina yongushu momina ndjika. Otwa thaneka okumboola ishewe o’NI43-101 compaliant resource’,” osho Omupresidende gwEhangano, Alex Helmel, a tumbula moshikundaneki shoka sha pitithwa momasiku 18 Maalitsa 2013.

Gross Otavi oyi li konyala ookilometa 12 kuuninginino waKombat,  nehala ndika pandjokonona olya kala niilonga yomina yehangano lyedhina Otavi Minen und Eisenbahn-Gesellschaft (OMEG) okuza momumvo 1904 sigo 1941.

Kombat Copper oyi li ehangano lyaCanada li nasha niilonga yomapekapeko nomapendulopo ge nasha noonzo dhiikwamina yongopolo moNamibia, noli limwe yomomahangano ga simana muuyuni ge nasha niilonga yongopolo.

kuMathias Haufiku

LEAVE A REPLY

Please enter your comment!
Please enter your name here