Okahao oka tokola ka gwanithile po oompumbwe dhopahumithokomeho

0
757
Okahao kokene oka tokola neitulemo opo ka gwanithile po oompumbwe dhopahumithokomeho dhoshilando Okahao nOshitopolwa Omusati.

MukuluOKAHAO – Omukuluntuwiliki gwElelo lyondoolopa Okahao, Gilbertus Mukulu okwa popi kutya nando kapena iimaliwa ya gwana, elelo lye olya tokola okuya komeho mokutula miilonga oopolojeka oonene dhongushu N$8.3 million mOmutengenokomwaalu gwopaimaliwa gwo2012/13.

Ashike oopolojeka ndhika, otadhi ka tulwa miilonga poompito dha yoolokathana omolwa iimaliwa inaayi gwana.

Elelo lyoshilando olya kambadhala opo li mone iimaliwa okuzilila miifuta omolwa omatungo, esiloshimpwiyu lyiiyagaya, omeya (gohanya) nayilwe nelanditho lyevi nosho tuu elongitho lyomashina nomambakumbaku, okutumbula po ashike yimwe po.   Nonando iimaliwa inayi gwana naapunguli inaye ya mo naanaa mevi lyoshilando shOkahao, Omukuluntuwiliki okwa fatulula kutya oongamba dhoshilando otadhi ka gwedhelwa nuule wookilometa ndatu kombinga kehe. Okutamununa oshilando huka, okwa dhilaadhililwa Oofaabulika nAanduluki nenge Aaetipo yiinima naamboka yena ehalo okupungula iimaliwa miilonga mbyoka, taye shi ningile mOkahao.

Omukuluntuwiliki ta tsikile ko tati, mOkahao omuna evi olindji lina ombiliha ashike  inali tulwa ominino dhomeya, omalusheno nosho tuu oopate. Ndele nando oshi li ngaaka, evi mOkahao olina ombiliha kuume. Sho osho nduno Elelo lyOshilando Okahao, lya hala opo li longele kumwe naantu nomahangano gopawumwene mboka taya ka kwashilipaleka pakulonga nokulongekidha omavi gokutunga omagumbo nomatungo galwe nosho tuu gokulongela iilonga yilwe.

Omukuluntuwiliki ota koleke lela noonkondo kutya, Okahao miilonga yopaliko oka dhenga mbanda, ko otaka nana oyendji mOshitopolwa Omusati molwashoka otaka gandja omayakulo kAakahao, AaTsandi nokaanamikunda dhomomudhingoloko.

Sho twa koneke nawa uuwinayi mboka hawu etelelwa kefundja, wo tawu imbi ehumokomeho mondoolopa, Omukuluntuwiliki okwa ulike kutya Okahao okena oompangela dhethimbo ele dhopawunongononi dhomikalo nkene kuna okukeelelwa omeya ngoka haga kunguluka.

Etembu lyaantu okuza komikunda taye ya mondoolopa, olya etitha uudhigu kOkahao nashika osha ningitha ompumbwe yomagumbo yi kale uudhigu uunene. Sho osho nduno, aku keelelwa okudhengelwa iipeleki mondoolopa, unene sho tuna ngaa mboka haya longele kumwe naatungi yomagumbo gombiliha ngaashi Omulandu gwaTutungeni Pamwe nEhanganano lyaakali yomomatsali/iipeleki [Build Together Scheme and the Shack Dwellers Association].

Omukuluntuwiliki ta tsu omukumo aakalimo opo ya longithe oompito ndhoka molwa ekandulopo lyompumbwe yomalukalwa. Ye ta gwedha ko pakugandja omayele kaakalimo tati, iimuna mbyoka tayi ka adhika tayi endagula mondoolopa, otayi ka mangwa e tayi ka mangululwa ashike uuna ooyene yawo ya futa kElelo lyOshilando. Elelo lyOshilando inali hala iimuna tayi endagula ashike mondoolopa ngaashi ya hala.

Omukuluntuwiliki ta tambula ko nawa AaNamibia ayehe, aatalelipo naaendanandjila taye ya kOshitopolwa shOmusati nosho tuu mOkahao kokenekene. Tati, naya dhimbulukwe nawa esiku lyomapendafule pamukalo gwoshiNamibia.

KuElwin !Gaoseb & Elizabeth Shigwedha

LEAVE A REPLY

Please enter your comment!
Please enter your name here