Omahumithokomeho mOndangwa otagi iyutha kompangela onene yomitungilo

0
470
Rafael Petrus Mavulu (kolumoho) nomonamati, Gebhard, pomatungo gongalashe. Mavulu (omukuluntu) ota ti okuna oshimpwiyu nomeya gefundja momudhingoloko na okuna okutembuka po mbala manga omvula inaayi tameka
Gebhard Mavulu, Omuwiliki omukuluntu pOngalashe yaMavulu mOndangwa, ota ulike ondodo yomeya pethimbo lyomvula.
Gebhard Mavulu, Omuwiliki omukuluntu pOngalashe yaMavulu mOndangwa, ota ulike ondodo yomeya pethimbo lyomvula.

ONDANGWA – Oongeshefa odhindji muka, unene oonshona naandhoka dhopokati, odha ti odhi li metitha lyoku ilongekidha opo dhi tembukile komahala galwe omolwa okukeelela omeya gefundja na shika otashi ka etitha opo omahala ngoka taya longele ngashingeyi ga ka kale itaaga longithwa muule woomwedhi.

Kakele, Elelo lyoshilando shaNdangwa olya lombwele Kundana kutya aawiliki yoshilando oya tokola ya kandule po omukundu nguka kuyele mo2009 konima sho iilonga yali inayi enda nawa omolwa omeya gefundja. Pahapu dhomupopiliko gwElelo lyaNdangwa, Luke Salomon, omakonaakono oga ningilwe konima yefundja lyomo 2009 lya konaakona olweendo lwomeya nonkene gena okukeelelwa.

“Ondjila yefundja oya ndhindhilikwa niilonga yokutembudha nokulongekidha nawa omahala gamwe oya Tameka opo ku  kwashilipalekwe kutya ekunguluko lyomeya itali imbwa kusha pethimbo lyomvula. Nandi popye kutya shika kashi shi oshilonga shokulongwa pethimbo limwe alike oshi na oku longwa aluhe. Kapena nande esiku ndyoka to vulu u tye uudhigu mbuka owe u kandula po thiluthilu molwaashoka oonkondo dheshito odhi vule dhomuntu kehe. Oompangela odhi li metifa opo omeya ngoka taga tondoka ga gongelwe e tapu tungwa Ondama yOshitambo mu pungulwe omeya gamwe.Omeya ngaka otaga ka longithwa pethimbo lyoshikukuta nenge uuna omvula inaayi loka nawa ngaashi ngashingeyi”, Salomo ta fatulula.

Omupopiliko gwoshilando ta gwedha ko ta ti, omatungo agehe omape mOndangwa otaga ka tungwa shi ikwatelela komalandulathano gompangela onene yomitungilo, kashi shi ngaashi nale omatungo ga tungilwe mevundakano.

Nonando oongeshefa odhindji mOndangwa omvula ndjika dha ninga elago okufutila omatembu molwa efundja. Yimwe yomoongeshefa ndhoka hadhi kala muudhigu wefundja omvula kehe oyo Ongalashe yaMavulu, ndjoka ya tungwa lela mokati koshana. Mwene gwongeshefa, Rafael Petrus Mavulu, okwa ti ye okwa kala ta longele pongehsefa ye mpoka moshana uule woomvula dhi vule omulongo. “Uuna efundja lya tameka okuna okukutha mo iihauto ayihe tayi longwa e teyi fala mpoka ka pena omeya. Sho osho nduno ndili molukongo lwehala lilwe”, Mavulu ta fatulula.

Ashike, etungo kehe, eshona nenge enene, olya simana noonkondo kElelo lyOshilando shaNdangwa, Salomo ta gwedha ko. Salomo ta ti: “Ondangwa, ngaashi naanaa iilando iikwawo moshilongo, oya taalela oluhepo lwomagumbo inaaga gwana na okuza omvula ya pita, oshipambu oshinene shiimaliwa pamutengenekwa-thaneko gwiilonga yopamitungilo otashi yi kokulongekidha evi opo ku gwedhwe ongushu kevi omanga inaatu li gandja kaakalimo”. Okwa tsikile kutya ompumbwe yevi lya longekidhwa (li na omeya, oondjila, omalusheno nominino dhokupitila omeya gonyata) onene unene ashike Elelo lyOshilando otali ka landula po omukundu nguka niiniwe iishona mbyoka lina po.

Kombinga yomagumbo, oshilando osha uvathana naNamibou ya longele kumwe mokutunga omagumbo eyovi limwe ge li ontega nEndiki lyOmalandithilo pOlunkono. Sigo oompaka omagumbo 100 molweetho lwotango oge li pokupwa, agehe oga landithwa po nale nokuli.Omatungo omakwawo moshilando ongaashi ehala enenenene lyomalandithilo lyaGwashamba, ndyoka Salomo ta ti olya etitha opo aantu yomOndangwa ya kale ye na omahala gokulanda ga yoolokathana. “Otwa nyanyukwa molwaashoka aapunguli yomomudhingoloko otaya hwepopaleke oonkalo dhaantu na kapena we  ompumbwe yoku enda iinano iile okuya kiilando yilwe u ka lande”.

Salomo okwa zimine wo kutya omahala gokukala mOluno, ndoka lu li olukanda olukulu mOndangwa, olwa monithwa iihuna nale molwaashoka kaluna iinima ngaashi ominino dhomeya gonyata nomalamba gomomapandaanda. Ashike, Elelo olya tula mo oolamba dhomomapandaanda ga adha poopelesenda 99 dhOluno, okuna ashike omapandaanda omashona ogo inaaga tulwa omalamba.  “Otwa uvanekela aakalimo yetu oopate dhoteya naaniilonga oye li nale miilonga nomashina go ku yelekanitha na otaya longo nuudhiginini opo ya tule mo oteya okuza pendiki lyuundjolowele sigo opomahooli gali gaPunyu. Pehulilo oondjila dhilwe nadho wo otadhi ka hwepopalekwa ngaa” Salomo osho a ti.

“Elelo lyoshilando olya gwedha po wo omalamba gopoopate kondjila ndjoka yu uka kokapale kaNdangwa, ya longitha iimaliwa yi thike pokati koomiliona mbali na ndatu.

LEAVE A REPLY

Please enter your comment!
Please enter your name here