Omhepo youdano weengonyo woMTC Sunshine otayi pepe mOshikango

0
250
Tyson Uushona (kolulyo) odula ya djako kena nando oudano a dengwa nomukalo waye wokuumba eengonyo otawu fuula na otwe lineekela kutya Ovashikango otave keya vahapu opo va yambidide oudano owu molwaashi eshi oshikando shotete oudano munene ngaha tawu ya mOshikango.

OSHAKATI – Ovashikango tambuleiko nawa omhito eyi ya fimana osheshi omafiyafanopo aa makula oudano weengonyo taa ka kala pokati ka Tyson Uushona na James Omogo wokoKenya efimbo lomadingonoko 10, oo kwa teelelwa a ka kale a fuula o taa shambula pokati kovadengingonyo ava vavali.

OMTC Nestor Sunshine Boxing & Fitness Academy otayi ka fala oudano weengonyo kOshikango muSeptember 7. Kakukutu moudano weengonyo Nestor Tobias, okwati eshi osho oshilalakanenwa shelitulemo lofikola yaye opo yi twale omaudano koitukulwa ayishe 13 moshilongo. Okwa weda ko tati ove udite etumba okukala tava longo meshikulafano eli shaashi molwaashi fiyo opapa ofikola oya talela po oitukulwa ngaashi; shokomunghulo wefuta Erongo, Oshana, Kunene, Hardap, Oshikoto nOmaheke oko kwa ningilwa omadeulo oudano weengonyo pondodo yovadani va pyokoka naavo opo tava tameke.

Otaku kala yo omaudano ovadani va pyokoka ooSamuel Kapapu oo ha dedaula vakwao molinga, otaka ya mondabo nependa likwawo Jatoorora “the Sting” Tjingaveta opo a amene Epapa laye lOmoshilongo lyondjudo yopedu [National Lightweight] . Omaudano amwe ovadani vopetameko otaa ka ulikwa/danwa novahumifikomesho voudano owu ova udaneka kutya otaku kala oufiku weengonyo tadi topa nosho yo omalihafifo eendaanisa opamwe nenyakwa mokwiimba Lady May oo taka mwenyeka ovatali.

Mwene wongonga, kadenga kUushona ta udanekele ovatali novayambididi onguloshi itayi ka dimbiwa. “Ame ondeli longekida nonda tokola oku mu mbwangulila eengonyo nde ta dimo mondabo” osho eli nomo ngaho. Outekete vaavo veli fimaneka vo tava fimanekwa oN$200 omanga vamwe to yandje ashike N$50.00. Molwaashi oudano weengonyo owo oudano wu holike kovanhu, ohatu kembadala apa hatu dulu opo va dule okufuta vo ve uye okutala, Tobias ta weda po.

Oudano otawu ka kala pEndiki lOmalandifilo mOshikango noutekete otava monika poComputicket moshilongo ashishe nomEndiki lOmalandifilo mOshikango. Oudano weengonyo otawu ka patululwa pambelewa po 18:30.

Komunambelewa Omukundaneki

LEAVE A REPLY

Please enter your comment!
Please enter your name here