Ominyeka yahomata, oya tana moshitukulwa shaShana

0
899
Vamwe vomooKalyamupombo va kwatwa po

ONGWEDIVA – Nonande oimbuluma shitukulwa shaShana okwali ya ya shuna pedu, omafiku aa, eengeshefa domalandifilo moshitukulwa eshi o da ponokelwa kooKalyamupombo vahomata. Moule woivike ishona, opolifi yomOshana, oya lopotelwa nale oikoya youlunga ihamano, omo mwa kwatelwa yominyeka ya homata modoolopa yaNgwediva itatu nomOndangwa itatu.

Vamwe vomooKalyamupombo va kwatwa po
Vamwe vomooKalyamupombo va kwatwa po

Komanda woshitukulwa shaShana Ndahangwapo Kashihakumwa okwa ti, ihapu yoimbuluma ei oya longwa melongelokumwe novanailonga vomeengeshefa omo mwa ponokelwa nooKalyamupombo.

Kashihakumwa tati nonande ka kwali kwa kwatwa eengangala odo da kufa ombinga momunyekwa wahomata mongeshefa yokuyandja omikuli mOndangwa, opolifi oye shi pondola oku tula mouipandeko ovalumenhu vane tava fekelwa va teya ofitola yoidjamolwa yoWarthog Clothing Shop na vakwao vali vavali ovo tava fekelelwa enenyeko kwahomatwa mombeka yomOndangwa.

Eshi ehokololo eli la shangwa, kapali pe na ou a kwatwa po shinasha nomunyeka wahomata pongeshefa yoPick n’Pay mOngwediva. Ashike, omufekelwa umwe okwa kwatwa po konima yomunyeka wa homata wa ningilwa eumbo lomukainhu mOngwediva. Kakele komulumenhu ou, ovafekelwa vane ova kwatwa eshi vali tava hetekele kuvaka posasiona yomahooli yoSelect mOngwediva.

Kashihakumwa okwa ti, peemhito dihapu eembudi oha di longele kumwe novanailonga ove have dipe ouyelele muwa nokuvaka, nomolwaasho ovalongi voimbuluma hava faduka po noupu konima yokuvaka, no ihava kwatwa kopolifi pefimbo.

Kashihakumwa okwa yelifa kutya nonande elongelo kumwe neembudi la indjipala, omakonaakono opolifi o a holola kutya ka pali nande omunailonga umwe wopo Select Service Station a longela kumwe neembudi, nomolwaasho opolifi ya pondola oku kwata ovalongi voimbuluma ava manga nokuli i na va fiya po posasiona.

Kashikumwa ta hokolola kutya eembudi edi ode uyile mokafitola kaSelect keengulasha defiku limwe no da tameka tadi li ningifa da fa tadi tanguna nokulwa. Vamwe vomooKalyamupombo ova tameka tava hepa eengonyo va yuka komashina oimaliwa, nelalakano opo ovanailonga va tile nova faduke po olwoodi,  voo (eembudi) va kufe mo oimaliwa momashina.

Ashike ovanailonga ova dengela opolifi meendelelo, neembudi edi oda kwatwa po. Komanda womatanga opolifi moshitukulwa shaShana, okwa kunghilila ovalongi voimbuluma ovo va faduka po, opo ve li yandje kopolifi, shaashi opolifi oi na omadina avo,  no itashi kwata efimbo lile va kwatwe po.

KuHelvy Shaanika

 

LEAVE A REPLY

Please enter your comment!
Please enter your name here