Ovakulupe vomOdibo omapendafule

0
332

ONGWEDIVA – Nonande kavefi vepata limwe, ovakulupe vavali vomOdibo  moshitukulwa shaHangwena ova longa nova longelwa oilonga yeli fa mefimbo lekondjelomanguluko.

Meekulu Ndalyatapeni Taleinawa yaNanghama nameekulu Ndeipala Ndelefina yaAbraham yaNghiyalahamba,  oohaukwe ovo va kwafela mekondjelomanguluko laNamibia. Aveshe, ova li modolongo, nova kanifila ovana mekondjelomanguluko Mefimbo loukoloni ovakulupe ava ova kala momukunda wa vo oo wa ama keengaba daNamibia naAngola, mOdibo,  tava longo moukumwe novanangeshefa moshilongo mokukwafela ovakwaita voPlana mokukondjela  emanguluko laNamibia.

Efimbo nefimbo ova telekela ovakwaita voo tave va holeke, ve va djaleka, no va holeka yoo oilwifo noilongifo yopaukwaita.

Meekulu Nanaghama wepipi lomido 88 ta ti: “Meumbo lange omwa li onduda yoshipeleki omo  mwa kala mwa holekwa oikutu noikwafifo yovakwaita voPLAN. Onda ya modolongo lwoikando o12. Oshikando shimwe onda idililwa mokanduda kokapeleki ke li mofuka. Ofamili yange kaya li ishi kutya ondili peni, naame mwene nghi shii po. Ongerki oyo yaka konga nge fiyo ya mona nge.”

Nonande eli mepupi loukulupe lela meekulu Nanghama natango ota dimbulukwa nawa ashishe osho a ningilwa naashi a ninga pefimbo lekondjelo-manguluko laNamibia.

Eshi a li modolongo  yomofuka, puye okwali ashike ha pe uya  omulumenhu omutilyane, nomukulukadi waye,  novalumenhu vavali, umwe owomu hoko wovaSan na mukwao womuHerero. Ovanhu ava oheva mono nande okonima yoshivike.

Ngee ta va i ohave mu fiile oshiyaxa omo he li yakulile ongokandjuwo, voo tave mu pe oumbishikiti vatatu ovo ha li efiku alishe. Omafiku amwe ohaa piti po ina lya, ina nwa,  ina uda elinyengo lomunhu, kakele kelinyengo loudila mofuka. Nande a li a tila momufitu,  okwe ke li twa omukumo pakudilaadila ovo vali va idililwa yo konhunu yaRoben Island koSouth Africa.

Meekulu Nanghama ta hokolola kutya okwa djoina oSWAPO mo1960, no kwa hongwa opolitika kuNetumbo Nandi-Ndaitwa oo eli paife oministeli yoshikondo shoikwapondje yaNamibia, pamwe naMonica Namweya nomonakadona Penny Hashoongo oo a fila moita. Pefimbo olo, ava vatatu ovali ovanafikola poSt. Mary pOdibo.

Modolongo okweli xula mo mo1988, konima eshi okatokolifo 435 ka ya moilonga. Efimbo olo okwa li a kwatwa pamwe naPetrus Naukushu naHandjaba a dile kOuhongo, no vali va idililwa modolongo yomOtavi.

Molwa omahepeko, modolongo okwa kwatelwa mo kelondolohonde osho sha etifa ovakwaita voKoevoet va kale have mu twala koshipangelo oule womafiku mahapu, ashike oufiku ohaka nangala kodolongo yee ta etwa ongula inene.

Meekulu wa Nanghama ota dimbuluka nghee a panga oukahewa nomukainhu omuDamara oo a shakeneka manga ali ha twalwa kovakwaita voKoevoet koshipangelo. Omukainhu okwe mu hololele kutya , yee okaume yoo kaJoel Namundjebo. Omukainhu ou ali ha popi yoo Oshiwambo  okwe mu pa a lye oshihakautu shaHawiishu osho sha kwafela ohonde i kuluke diva.

Nonande ovo va kwatelwe pamwe naye va mangululwa mo modolongo mOtavi vaye komaumbo avo, meekulu Nanghama okwa kufwa mo mongudu yavakwao ndee ta lundululilwa ashike kodolongo yokapeleki yali kOsire, oko aka mangululilwa konima yomafiku. Ekufombinga laye mekondjelomanguluko, ole mu kwatakanifa novanangeshefa vahapu vokombinga yokolundume lwoshilongo, ngaashi Eliakim Namundjebo nomumwaina Joel Namundjebo aveshe oonakufya paife, oshoyo ngolonea woshitukulwa shaHangwena paife Usko Nghaamwa, ovo va kala haave mu pe oinima i holekwe meumbo laye. Meekulu Nanghama ta ti omafimbo mahapu okwali ha tumwa aka lande oikutu yomahombolo aavo vali moupongekwa.

Eshi Namibia la manguluka, ovakulupe ava vavali ova pewa olupandu nova talika pambelewa ongovakondjelimanguluko. Meekulu Nanghama ota ti: “Paife ohandi kofa handi mbonyoka shaashi lotauka vali medina lomakakunya, no nda valulwa ndimukondjelimanguluko. Efyo shapo tali tu tukula noSWAPO”.

Haukwe waye meekulu Ndeipala Nghiyalahamba womido 74, oo eumbo laye li li popepi no lameekulu Nanghama oye yoo umwe womomapendafule oo a dana onghandangala mekondjelomanguluko.

Meekulu Nghiyalahamba okwati, oilonga yaye nayo oi shiivike kovakondjelimanguluko vooMartin Shali nooCharles Namholo. Naye okwa tuvikilifwa oilwifo noinima ihapu yovakwaita voPLAN osho she mu hepekifa neeghono, noshe mu tulifile modolongo. Ovana ovamati vatatu ova ile  moupongekwa.  Umwe okwa fila ko na mukwao,  okwe ya a lemana

Ota ti, opolitika okwe i uda kumumwainamati opamwe nomuPresidende Hifikikepunye Pohamba naEliaser Tuhadeleni oo ali a shivika nawa Kaxumba kaNdola. Ta ti, “Ehokololo lange mekufombinga lekondjelomanguluko laNamibia oli le neennghono.”

KuHelvy Shaanika

LEAVE A REPLY

Please enter your comment!
Please enter your name here