Ta kundaneke, ta longo, ta nyanyudha

0
297
Ominista yOmauyelele nOmakwatathano, Joel Kaapanda

WINDHOEK – Ominista yOmauyelele nOmakwatathano, Joel Kaapanda, oya ti e tote po lyoshifokundaneki shOshiwambo shedhina Kundana otali ka kwathela oku kundaneka muule  aaleshi yelaka lyOshiwambo.

Kaapanda okwa lombwele omutoolinkundana nguka ta ti, ooperesenda dhaaleshi yelaka lyOshiingilisa odhili pevi noonkondo  moshilongo naaleshi yomalaka galwe gaavalelwa mo oya patelwa pondje nge tashi ya koonkundana moNamibia.

Minista okwa ti, ooperesenda owala dhimwe po hadhi lesha noku uva ko nawa elaka lyoshitakumi omanga ooperesenda odhindji hadhi lesha nokuuvako omalaka gaavalelwa mo.

Kaapanda okwa tumbaleke Kundana onga oshifokundaneki  tashi ka gandja oompito kaashangi yuutewo , aanyandi noshowoo komahokololo ngoka taga nyanyudha aaleshi yelaka lyoshiwambo.

“Sha simana kombinga yoshifo shika, aaleshi otaya ka kundanekwa miinima yinasha nomidhingoloko dhawo oshowo oonkundana tadhi yazilile koombinga dhiili nodhiili moshilongo oshowo muuyuni,” minista ta ti.

Kaapanda okwa ti Kundana otaka kala uuyamba uunene kaaleshi , uunene tuu mokuya  kundaneka kombinga yaashoka tashi ningwa momidhingoloko dhawo ngaashi uukalinawa, ondjokonona yoshilongo noshowo okulesha omishangwa nomauyelele neyambulepo lyoshilongo.

Kaapanda ta tsikile ko ta ti  oshifokundaneki shika otashi ka kundaneka wo aapopi yElaka lyOshiwambo kombinga yomalandulathano  giikondo ya yooloka mEpangelo.

“Ondi inekela Kundana otaka kala lela ngaashi edhina lye tali ti, ano ta kundaneke, ta longo, ye tanyanyudha. Kundaneka otaka kala e na iileshwa tayi popi kombinga yelongo, oongeshefa noshowo omapukululo ogendji ga pumbiwa moshigwana”, minista ta ti.

Kundana otaka kundaneka omapipi agehe gaaleshi yOshiwambo okuza kaakuluntu, aanona, naagundjuka.

Kaapanda okwa gwedha pot a ti  aanangeshefa aashona naamboka ya huma ko  otaya ka mona oompito dhokutseyitha iipindi yawo mElaka lyOshiwambo.

KuLoide Jason

LEAVE A REPLY

Please enter your comment!
Please enter your name here