Aagundjuka yo Tsandi Basketball Academy

0
400
Dee Danielson (moshikutu oshiluudhe) a thanekwa pamwe naanona yamwe mboka ye li ngashingeyi metonatelo lye mehangano – Tsandi Basketball Academy.

TSANDI – Ope na eyeletumbulo ndyoka tali ti kutya ngele to gandja sha koohepele nenge aathigona, ino pitika nando okwaako kwoye kolumoho kutseye shoka okwaako kwoye kwokolulyo shoka taku ningi, opo omagano goye  ga kale oshiholekwa, kakele shika hasho ngele tashi ya komunamimvo 30 Dee Danielson, omugundjuka omukwetu ngoka a yambukile momudhingoloko gwaTsandi moshitopolwa Omusati muumbangalantu waNamibia.

Danielson, ngoka a li nale omudhani gwosipana yopashigwana yokatanga komokambamba, ngashingeyi okwa ninga Robin Hood gwopethimbo ndika mokati koshigwana shomudhingoloko gwaTsandi okupitila mehangano lye lyedhina Basketball Academy, ndyoka tali tsu omuthindo okuyambula po oonkalamwenyo dhaamati naakadhona aagundjuka mondoolopa ndjoka.

Tsandi Basketball Academy, ndyoka li li ehangano lya totwa po momumvo 2010, ohali kwatha  aagundjuka mboka ye hole omaudhano nokuyambula po ombepo yomaudhano, okudhana pangundu, okulongela kumwe, omaihumbato omawanawa, sho ehangano ndika tali kwatha aagundjuka ya likole nokumona omaunongo omape oshowo okukaleka po ombepo yuukuume tayi kalelele okupitila mokatanga komokambamba. Ehangano ndika basketball academy tango okwa li lya totwa nelalakano okuyambula po nokuhumitha komeho ombepo yuudhano wokatanga komokambamba moshitopolwa shika shomuumbangalantu woshilongo, oshowo okugandja ompito kaailongi mboka ye hole omaudhano ya vule okuulika iitalenti yawo moshimpungu shika.

“Kungame osha kala aluhe shi nasha nokukala nehalo okweeta po eyooloko  moonkalamwenyo dhaagundjuka aamati naakadhona yopomukunda gwetu, nondi uvite lela uuntsa sho aanona taya kala ye nasha shoka taya ningi konima yootundi dhosikola. Aakwashigwana oya kala lela ya pandula nokuyambidhidha ehangano ndika oshoka olya ninga egumbo lyawo etiyali lya simana kaanona yawo,” osho Danielson ta ti.

“Omaidheulo ngaka gokatanga komokambamba konima yootundi dhosikola, oga ninga oshilongadhalwa shawo shesiku kehe sha simana kaanona moTsandi oshowo omikunda dhopomudhingoloko, mboka tashi vulika kwali awike ye na okukala taya elaela momapandaanda nenge okukala ashike ye li omitumba momagumbo kaa ye na shoka taya ningi. Nonande oshimaliwa nenge eyambidhidho lyopashimaliwa oshowo iilongitho inayi ihwapo nawa, poompito odhindji iinima mbika iyali otayi yi moshipala eyokomeho lyehangano ndika. Kakele ngame ondi na etegameno natango kutya otatu ka adha iilalakanenwa yetu mbyoka twa tula po, nesiku limwe otashi vulika osipana ndjika yokatanga komokambamba yi ka kale momaudhano gopashigwana.

Danielson, ngoka e li omudheuli a pyokoka paInternational Federation of Basketball Associations (FIBA), pethimbo ndika oku na aanona ya konda 30 mboka ye li metonatelo lye, ota ti ondjodhi ye okumona andola esiku limwe etata lyomadhina gaanona mbaka ye li iilyo yosipana yopashigwana nenge taya dhanene oosipana pondje yoongamba dhaNamibia.

KuOtniel Hembapu

LEAVE A REPLY

Please enter your comment!
Please enter your name here