Dillish – E ya noshimaliwa

0
961

WINDHOEK –  OmuNamibia ngoka a kutha ombinga moBig Brother Africa, ndjoka ya kala nokuulikwa lela koTiivii, Dillish Mathews, okwa yangata ko esindano lyoshimaliwa oshindji, shokapandi koodola dhaAmerika U$300 000, shoka ta ti ote ke shi longitha okulandela ofamili ye egumbo.

“Ngaashi nde shi mu tseyithile amuhe, ngame otandi ka landela ofamili yandje egumbo. Ngame otandi ka landa evi nokutungila ofamili yandje egumbo eshona ewanawa. Ka li shi andola egumbo lyondilo unene, ashike ehala moka omuntu ta kala e uvitile mo uugumbo,” osho e shi yelitha neimemeho,  nokugwedha po kutya okwa tseya konima ngele moshimaliwa moka omwa zi iifendela yokongulu, ano otekisa yepangelo, otashi vulika itapu ka hupa ashike oshimaliwa oshindji.

Omunamimvo 22 Mathews, ngoka e li gwotango OmuNamibia a kutha ombinga moBig Brother Afrika ta sindana oshishani shika, okwa kala megumbo ndyoka uule womasiku 91 inaa kuthwa mo ngaashi kwa li sha ningilwa yakwawo mboka ya kuthile ombinga momainyanyudha ngaka, nokwa li ya shunithwa koyaandjawo kaatali yotiivii Aayafrika.

Shi nasha nonkundana yomuholike-mati gwe ngoka ya kala naye oomvula ne, Steven Gaeseb, pethimbo ta ulikwa nokutseyithwa kutya oye omusindani, Mathews ota ti: “Eeno onde mu pataneke, ihe shoka oshi li ashike mondjila, oshoka ngame okwa li nde mu tila, nomutseyi gwomadhiladhilo gwokulonga kwomuntu okwa ti oshi li ashike mondjila ngaaka,” osho a tumbula omanga a tula epandela lyaNamibia komatundji ge.

Sho Gaeseba okwa li a etwa komeho mOlyomakaya, esiku lyesindano enene, Mathews ota ti: “Uhm, oshishani  shesindano osha li ehaluko enene, oshoka oBig Brother, oshinima shopauntu.. Ngame okwa li lela wo nde mu tila, kakele shika osha li oshinima oshiwanawa lela unene shoka kwa li e shi ningile ndje.”

Okwa tumbula wo kutya okwa li e shi tseya lela kutya ita ka ninga euvaneko lyohango uusiku mboka oshoka okwa li nale ya longekidha nawa onkalamwenyo yawo nokwa li  ya tula po esiku lyondjokana yawo pamwe nofamili ye.

“Okwa li nde shi tseya nale kutya ita ka pula ndje tu hokane, oshoka okwa li twe shi kundathana. Otatu ka hokana ngele ethimbo olya thikana, ano ngele okwa ningi shoka a hala okusindana monkalamwenyo ye oshowo ngele ngame onda ningi wo shoka ndi na okuninga. Ngashingeyi otu li ashike mohole ya tsa kesipa shi vulithe nale,” osho ta yelitha. Mathews ota ti kutya ina koneka ngele omumati gumwe moBig Brother a za koNigeria  okwa li e mu hala, nokwa li a ngwangwana ngele oye li meiyuvo lyopahole nenge aawe.  “Melvin? Kandi shi wo,” osho a yamukula sho a pulwa ngele okwa li a hala okweetha po omuholike-mati gwe ngoka a kala naye, ta gwedha po ta ti: “Ngame onde ke shi koneka ashike konima sho twa zi mo megumbo ndyoka kutya okwa li a hala ndje. Ihe ngashingeyi okwa laata, tse otatu vulu ashike okukala ookuume paife.”

Mathews okwa li a kundanekwa konyala muAfrika alihe mOsoondaha, sho a kala gumwe gomaakuthimbinga yatatu methigathano kutya oye ta ka thigala mo megumbo, mokati kayakwawo 28 mboka ya za miilongo 14.  Aakuthimbinga yaali kehe okwa li ya kalele po iilongo yawo mbyoka ya kuthile ombinga. Matthews naMaria Nepembe, ngoka kwa li a kuthwa mo megumbo ndyoka konima yiiwike itano megumbo ndyoka, okwa li ya kalele po Namibia. Iilongo mbyoka kwa li ya kutha ombinga oyo ngaashi Angola, Botswana, Ghana, Ethiopia, Malawi, Namibia, Nigeria, Kenya, Sierra Leone, South Africa, Uganda, Tanzania, Zambia oshowo Zimbabwe.

KuJemima Beukes

 

LEAVE A REPLY

Please enter your comment!
Please enter your name here