KUNDANA A THIKA KOSHIGWANA

0
841
Omunashipundi gwoNew Era Publication Corporation Dr. Ben Mulongeni ta popi poshituthi shepatululo pambelewa lyoshifokundaneki oshipe melaka evalelwamo shedhina Kundana mOngwediva

Oshifokundaneki oshipe shoNew Era Publication Corporation (NEPC) shedhina KUNDANA osha thiki mokati koshigwana mEtitano lya zi ko, nokwa li sha taambiwa ko  nomaako agehe koshigwana.

Kundana oshi li oshifokundaneki shotango shaNamibia moka mu na oonkundana tadhi leshwa melaka limwe lyomomalaka omavalelwamo gomenenevi Afrika. Oshifokundaneki shika Kundana hashi nyanyangidhwa koshiwike shi li mOshiwambo ano mOshindonga nOshikwanyama, okwa li sha egululwa pambelewa  poshiningwanima oshinene mEtitano lya zi ko pOmauliko gOpaipindi mOngwediva.

Petameko oNEW Era Publication Corporation(NEPC) otayi ningi omalolelo ge nasha nokulesha oshifokundaneki Kundana, oshoka elaka lyOshiwambo olya thikama po moshitopolwa oshinene shaakwashigwana yomoshilongo, nokulesha elaka ndika okwa kwatela mo wo iitopolwa yilwe muumbugantu woshishiindalongo Angola, omanga enenedhiladhilo lyenyanyangidho lyoshifokundaneki shika inali  ningwa momalaka galwe omavalelwamo nenge gomoshilongo.

Omunambelewa Omukuluntu gwoNew Era Publication Corporation –NEPC, Dr. Audrin Mathe okwe shi yelitha kutya oshifokundaneki Kundana oshi li ashike shimwe shomiinyanyangidhwa oyindji mbyoka tayi ka hololwa po mbala kehangano ndika.

Ota ti mokutota po oshifokundaneki Kundana, NEPC, ota gwanitha po oshilalakanenwa she oshowo iinyanyangidhwa yilwe oyindji tayi ka hololwa po mbala koNEPC. Pauyelele waMathe, osha konekiwa nawa kutya ngele aantu taya popi oNew Era, olundji otaya popi oshifokundaneki shoNew Era, shoka shi li shimwe shomiinyanyangidhwa yoNEPC.

Onkee, kakele koshifokundaneki shoNew Era oshowo oshifokundaneki oshipe Kundana shoka opo sha nyanyangidhwa, NEPC oku na wo edhiladhilo okukala e na oshinyanyangidho shemwene, shi kale shimwe shiiyetwapo yilwe nenge ooprojeka dhilwe ndhoka tadhi vulu okuyambula po omuthika gwehangano ndika painiwe.

Mathe ota ti kutya omvula ndjika ashike, NEPC ota ka longitha okapandi koomiliyuna omulongo nane (N$14 million) shi nasha nokunyanyangidha, nomuyalu nguka otagu ka gwedhelwa ishewe okuya poomiliyuna omilongo mbali nandatu (N$23 million) omvula tayi landula, shoka sha konda lela peyambidhidho lyoshimaliwa shoomiliyuna heyali okuza moshiketha shEpangelo.Onkee, okutota po oshinyanyangidho otashi ka hupitha lela oshimaliwa shehangano shoomiliyuna odhindji. Ooprojeka dhilwe ndhoka dha thanekwa okutulwa miilonga ongaashi Endiki lyoNEPC li nasha nUutoolinkundana (NEPC Centre of Journalism) oshowo oshikondo shokutseyitha iipindi – oshikondo shiipindi kontu (advertising agency), nosho tuu.

Mathe ota ti NEPC ota vulu okukala oshiholelwa komahangano galwe gepangelo okuhulitha po ombepo yokuyaminina – nenge okwiikolelela komayambidhidho gepangelo, oshoka ehangano ndika itali ka pumbwa we ekwatho okuza kepangelo okuthika andola momumvo 2017.

Amushanga Omukuluntu mUuministeli wOmauyelele nOmakwatathano gOpautekenika, Mbeuta Ua-Ndjarakana ngoka wo kwa li a gandja oshipopiwa shOminista yOmauyelele nOmakwatathano gOupatekenika, Joel Kaapanda, okwa pupula kombunda nokupandula oNEPC omolwosheetwapo shika oshike – ano oshifokundaneki shika oshipe. Ota ti okwa tseya kutya Kundana otashi vulika a tsakaneke omagandjombedhi, nonando okutotwa po koshifokundaneki shika oshi li onkatu ombwanawa noyi li mondjila. Ota ti nelalakano okwaandjaganeka omauyelele noonkundana mokati kaakwashigwana ayehe, mwa kwatelwa aakwashigwana mboka inaya mona elongo moshigwana, omauyelele oge na okugandjwa nokukundanekwa momalaka omavalelwamo.

“Aatumwa sho ya tameke nUukriste, Ombimbeli oya fatululwa momalaka gomoshilongo nenge omavalelwamo, shika osha li ondunge okuya mekwatathano nawa naakwashigwana nenge aantu. Onde shi koneke kutya aantu otaya ka pula kutya omolwashike Oshiwambo, ihe omuntu oku na okutameka nelaka limwe,” osho Ua-Ndjarakana ta ti.

Ngoloneya gOshitopolwa Oshana, Clemenus Kashuupulwa okwa li a pandula noonkondo osheetwapothaneko shika oshipe, nokupupula kombunda oNEPC omolwosheetwapo shika.

Kashuupulwa ota ti oshifokundaneki Kundana otashi kala awike nokulonga oshowo okumwenyeka aaleshi/aakwashigwana, ihe oshifo otashi ka gandja wo ompito kaantu opo ya holole omaiyuvo gawo melaka lyawo yene.

Ngoloneya ota ti, omathimbo ga pita, sho omaiyuvo gamwe inaga vula okunyanyangidhwa oshoka omahala oga ngambekwa ngoka taga adhika miifokundaneki.

Kakele koshifokundaneki Kundana, oNEPC, okwa li wo ya egulula pambelewa epandja lyopaintaneta (website), epandja ndika lyopaintaneta lya tulwa pomuthika gopombanda lyoNew Era, Kundana’s website oshowo hali longo koongodhi dhopeke – ano ooselula.

Ominista yIinima yOonakulwa Aakulu, Dr. Nickey Iyambo oye kwa li e egulula pambelewa oshifokundaneki shika.

Omunashipundi goNEPC, Dr. Ben Mulongeni ngoka a pandula Dr. Mathe pamwe naaniilonga ye, ota ti etote po lyoshifokundaneki Kundana otali ulike kutya Namibia ota ende mondjila yi li nawa. Ota ti muule womimvo odhindji dha piti, oshilongo osha kala shi ikolelela kiifokundaneki ya nyolwa mOshiingilisa, naashika osha yooloka niilongo iikwawo yaAfrika ngaashi Nigeria.

Mulongeni okwa gandja omayele kutya osha simana opo oshilongo shi kale nelaka lyopamuhanga kaa li shi Oshiingilisa.

“Ngame otandi tsu wo kumwe nOmusimanekwa Kashuupulwa, kutya inatu sa ohoni okupopya Oshiingilisa shili momukwelengendjo gOshiNamibia ano Namlish, AaNigeria ohaya popi Pidgin nohaya kala ye uvite uuntsa,” osho Mulongeni ta ti.

KuHelvy Shaanika

LEAVE A REPLY

Please enter your comment!
Please enter your name here