Omhumbwe yeenhele dokudanaukila moNooli

0
176
tava danauka konima yedimbuko lofikola, mepandavanda mOshikango.Kids playing after school in the street in Oshikango.

WINDHOEK – Metalelepo lange koNooli omafiku a dja ko  onda didilika nghee oilonga ihapu yomatungo ili metifa , okudja ngoo komaumbo mape wa yuka komatungo mape nokuhadimbwa ko yoo eenduda domanwino omafele odo tadi monika apeshe. Potete okwa li handi diladila kutya eenduda domanwino kadi kumwifa naanaa , fiyo osheshi nda shakeneka ounona,  unene tuu ounona vofikola ovo tava shingi ashike peendingosho apa , nokukala momapandavanda,vo vamwe tava dana etanga kondje yoluumbo lofikola osho yo momapandavanda.

Onda diladila pokafimbo opo kutya eshi oshi li pamushingo, unene eshi tashi ningwa ashike mOngwediva, kakele eshi nda ya kOshikango nokOndangwa osho ngoo vali nda  hanga ko. Onda dilaadila nee kutya pamwe ovanhu vaaku osho hava kala ngaha,  ashike onda kala yo ndina ehalo lakula ndi shiive kutya omolwashike mbela  shi li ngaha . Onda tokola nee okupula ovakalimo vamwe  nounona  vomomudingonoko ou  kombinga yonghalo  ayishe eyi, nomanyamukulo avo kakwali nande taa hafifa.

Omukalimo umwe womOndangwa okwa  ti : na  ohandi endulula “ Apa kapena sha shounona,ounona alushe oveli ashike peendingosho, peenhele domalandifilo, ndee kapena eenhele dokudanaukila. Osheshi nee ovakulunhu vetu va putukila  monghalo ya yooloka  , vo otava ti ngoo onhele otayi humu komesho,  omolwashike nee itava dilaadila okutungila ounona sha, onhele ngoo  yokukala , omudingonoko muwa wokudanaukila, vo va hafe ngoo. Otava tungu ashike osho inashi pumbiwa  vo itava tale koinima oyo ya fimana.”

Omukalimo mukwawo womOngwediva okwa popya tati na ohandi endulula “Ounona ava kavena  onhele  opo tava  kala va manguluka okuhafela pamwe,kapena ike nande onhele yokudanaukila imwe opo tava dulu okuuya pamwe nokuupaafana omayele nokupanga oukaume noshonosho. Eshi omukundu wa kula, nakeshe efiku ohandi mono etungo lipe tali wedwa komatungo a kula eengeshefa kakele kapena nande umwe ta dilaadila sha shinasha nouwa wounona. ”

Eshi nda pula vamwe vomounona meenhele edi kombinga yonghalo eyi, omanyamukulo avo okwali naanaa  eli fa , tava ti kutya ohava shakene  konima yedimbuko lofikola, va danauke , vo va popye navakwawo momapandaanda nomafimbo amwe omodoolopa ile koshi yomuti opo ngoo va shikule osho tashi  linyenge apa naapenya,  osheshi kapena vali onhele imwe opo tava dulu okukala.

Kapena omalimbililo kutya  okapale komaudano ile eenhele dokudanaukila otadi ka kala ekwafo  linene kounona pamikalo dihapu.

Ondi  wete  kutya okapale komaudano oka fimana neenghono molwaashi eyi oyo onhele  iwa unene kounona oku eta po omaunongo ngaashi okulifikamena, okulongelakumwe nosho yo okuhapupalifa omainyengo opalutu.

Onhele yokudanaukila otayi dulu ikale ihena naanaa efimano lasha kovakulunhu ashike  kokaana otayi ti sha shihapu molwaashi  itayi dulu ashike okukufa ounona meenghalo dii ashike oyo  onhele ile tayi dulu okukala onhele oyo peemhito dimwe ounona tave li shiiva vovene nokushiiva yo osho va hala va  ka kale . Eyi onhele apa taveli deulile  shihapu sha kwatela mo omikalo domakwatafano, oku eta po oilalakanenwa , okukundafana oyiteelelwa,  , oku udafana, nokupanga oukaume.

Omudingonoko tawu wapalele ngaashi onhele yokudanaukila owo oshitukulwa shekulo lokaana  owo  tawu  kwafele okaana oku eta po oiyetwa po yako kuko vene, okukonga eemhito dipe, okuninga omatokolo madjuu  noshowo okushiiva  oilanduli, okulihonga okulonga novanhu, notashi va hongo yo omaunongo a fimana opanghalafano.

Osho handi kendambala okutula poluhaela osheshi kutya okulongifa oimaliwa moupale wokudanaukila oshina etumba unene molwaashi apa  opo ounona tava ka kula nawa nokulikola omashiivo a nakupwe meenghalamwenyo davo.

KuSelma Neshiko

LEAVE A REPLY

Please enter your comment!
Please enter your name here