OvaNamibia kave na edu

0
213
Presidente Macky Sall, Presidente Hifikepunye Pohamba nomukokoli president Dr Sam Nujoma ependafule  la tofwa mo woina, ve li komesho yoshihongwafano  Dr Nujoma  sha uvikululwa pOmugulugwombashe.
Presidente Macky Sall, Presidente Hifikepunye Pohamba nomukokoli president Dr Sam Nujoma ependafule la tofwa mo woina, ve li komesho yoshihongwafano Dr Nujoma sha uvikululwa pOmugulugwombashe.

OMUGULUGWOMBASHE – Epangelo otali kongo po omikalo dimwe nghee  li na ku longekidila edu ovaNamibia ovekee na edu.  Edi, oda tumbulwa komupresidente Hifikepunye Pohamba fiku ledimbulukwo lomapandafule pOmugulugwombashe moshitukulwa shaMusati, konima yeedula 47, eshi ondjebo yotete yekondjelomanguluko ya topa. Poshivilo  opa li omangungo ovakwashiwna omayovi nomayovi.

Omupresidente Pohamba okwa ti, konima yeedula 23 da pita po, natango ovaNamibia  ovo inava  makela ouwa woiimati yaNamibia , kave na edu.

Omupresidete ta ti:“Omulandu womulandi nomulandifi ou a hala  opo u li, ndele  itau longo ( itau ulike oiimati ya sha). Ohatu teelelwa tu konaakone kutya, omukalo ulipi tu na ku longifa tu longekidile ovanhu vetu edu.  Oshilongo osha kondjelwa opo ovanhu va dule ku mona edu, novakee na edu ove na ku mona edu”.

Ta twikile nokufatulula kutya: “Omulandi  ou  a hala opo e li, ashike kape na  ou a hala ku landifa edu. Epangelo oli ilongekida okulanda edu kwaavo ve li na, ashike  omukalo wavo wokuha hala ku landifa edu, otau  tu pendulile omadilaadilo tu  mone nghee tu na ku yandja edu  kovanhu vetu”.

Omupresidente Pohamba okwa  weda po kutya, epangelo oli na ku kondjala li longekide edu  lokeedoolopa , opo ku longekidwe eenhele.

Ta lombwele omangungo ovanhu omayovi mahapu va li va ongala poshivilo shedimbulukwo lefiku lomapendafule  kutya, epangelo ola kala le i pyakidila notali twikile ku andjaneka olusheno nomeva komikunda,  tali tungu oundjuwo oshoyo oitauwa oyo tai kwatakanifa kumwe eenhele da yooloka moshilongo.

Omupresidente waSenegal Macky Sall naye opo a li poshivilo, a shivwa  kupresidente Pohamba,  nokwa pewa ombadi yefimaneko oyo hai pewa ovo va dana onghandangala yakula mekondjelomanguluko.

Olomakaya, omupresidente Sall eshi a helukila nodila pokapale keedila kaNdangwa, okwa shakenekwa komuprediente  Pohamba noilyo yomutumba wopashiwana  novanadiplomate. Sall, ta kala moshilongo fiyo Etine, ota i keenhele da yooloka koshikunino kEtunda, kOkaukuejo, konhele yokulongela omongwa kOmbaye nosho tuu.

Kakele komupresidente Sall , poshivilo shedimbulukwo lefiku lomapendafule opa li yoo ovadiplomate vokoilongo,  oilyo yeumbo lopashiwana ya ya moshipundi shetulumuko,  ovanapolitika, ovanageshefa, nongudu inene yovakwashiwana.

Pomhito opo tuu okwa uvikululwa oshihongwafano shaxe yoshiwana shaNambia, Dr Sam Nujoma, sha tungwa monhele yomapendafule.  Petameko lela loshivilo, okwa yandjwa embo lefinamango loSWAPO.

KuHelvy Shaanika

LEAVE A REPLY

Please enter your comment!
Please enter your name here