Shihepo okwa nyokomwa osho Tobias ta ti

0
302
Omaipulo ogendji ge nasha nongushu yetokolo lyaagandji yiitsa poludhogi nduka pethimbo lyolugodhi lwoWBO pokati kaWilberforce Shihepo naArthur Abraham.

WINDHOEK – Omudhengingonyo gwaNamibia gwepaya lyuuyuni ngoka kwa li a tegelela e shi endithe nawa, Wilberforce “Black Mamba’ Shihepo okwa li a dhengwa kuArthur Abraham momaudhano goongonyo ngoka inaga enda nawa goWorld Boxing Organization (WBO), ano muudhano woongonyo wepaya lyoshiviha shopokati moSports Congress Centre shaSchwerin, Germany uusiku wOlyomakaya.

Omuunganeki gwaShihepo, Nestor Tobias ka li a tompelwa lela nokwa li a gandja ombedhi ketokolo lyaagandji yiitsa, ta ti omudhani gwe okwa li e shi enditha nawa andola okukala a sindana po epaya ndyoka, noku na eitaalo kutya oshizemo osha ‘nyokomwa’ okugandja esindano ndyoka kuAbraham ngoka ka li e na okusindana.

“Otwa li lela twa halukithwa ketokolo lyaagandji yiitsa, oshoka otwa li twa kumwa lela sho kwa li twa tala olugodhi ndoka nkene kwa li talu ende. Shihepo okwa sindana olugodhi, nokwa li e shi enditha lela nawa pwaa na omalimbililo oku shi talela methigathano alihe ndyoka, okuumba nokudhenga kwe oongonyo okwa li lela te shi enditha nawa nokwa li omudhingi goongonyo dhingi uusiku mboka.

“Shihepo okwa li a dhenge omukondjithi gwe nawa medhingoloko etitano, ihe nkene aagandji yiitsa ya gandja po olugodhi ndoka kuAbraham, omuntu ito shi uvu ko nuupu,” osho omuyambidhidhi gomaudhano goongonyo gwaNamibia ta ti, ngoka e shi koleke kutya osipana ye oya yandja enyenyeto pambelewa mbala koWBO konima ashike yolugodhi.

“Otwa hala lela etalululo li ihwapo li nasha netokolo ndyoka lyoshikengelela, oshoka kalya li ashike pauyuuki kuShihepo oye awike, ihe uudhano awuhe pakwalukehe.” Aatalinawa yomaudhano okuza koBoxing News oya hokolola wo okulwa kwaAbraham uusiku mboka kutya inaku enda nawa, omanga aniwa ka li naanaa e na ombepo yolugodhi poompito dhimwe pamwe nOmunamibia ngoka a kutha ombinga momaudhano ngoka goongonyo.

Otaya ti: “Arthur okwa kondjo lela naShihepo muule womadhingoloko 12.” “Shihepo okwa dhenge Abraham medhingoloko kehe lyolugodhi, nonando okwa mono esindano ndyoka tali limbililike, osha yela kutya olugodhi lwe italu ka ya kokule, oshoka esindano lye ota vulu ashike oku li tala ko kutya etokolo e li pewa omagano.”

Aaholi yomaudhano goongonyo yamwe mboka ya popi kepandja lyokointaneta (website) kutya aagandji yiitsa oya nyokoma lela. Engathithi lyaamboka ya li pomaudhano ngoka nayo oye shi holola sho wo nomukalo gumwe sho ya igidha taya ti:”booooood,” etokolo ndyoka olya puka, omulumentu ngoka okwa pewa ashike esindano, osho gumwe gomaatali yomaudhano ta ti. Abraham okwa kala a hala esindano unene noonkondo, opo a ninge omukondjithi gwepaya lyuuyuni okukondjitha ngoka e na epaya ndika lyoWBO pethimbo ndika Robert Steiglitz.

“Otatu ka pula oWBO yi talulule etokolo ndika, oshoka otwa tseya atuhe kutya Shihepo okwa li a gwana okupewa ompito ndjika yokusindana shi vulithe Abraham,” osho Tobias ngoka a geya ta ti.

KuCarlos Kambaekwa

LEAVE A REPLY

Please enter your comment!
Please enter your name here