Yambula po uudhano wohoki moshilongo

0
202
Oonakuhola ohoki yomoshitopolwa shaKavango ya thanekwa pethimbo lyoshituthi shokugandja omayambidhidho moRundu, mpoka Ehangano lyaNamibia lyohoki opamwe nOmina Supplies taya gandja omakwatho guuti wohoki kaanamudhingoloko. –Efano: olya gandjwa

KAVANGO – Ehangano lyoHoki  moNamibia [Namibia Hockey Union (NHU)] melongelo kumwe nOmina Supplies omasiku ngaka oya kwashilipaleke ishewe eitulemo lyawo moku yambula po uudhano wohoki moshilongo, sho ya gandja uuti wokudhanitha ohoki wu li 22 kaaholi yohoki moshitopolwa shaKavango, nelalakano okuhumitha komeho uudhano moshitopolwa.

Paku gandja iinima yoyene, Omina Supplies, ngoka e li oye omukwathi nomuyambidhidhi omunene mehumitho komeho lyohoki moNamibia, oya gandja ishewe uuti wonomola ya gwana u li 22. Sigo oompaka uudhano woliha una oosipana mbali dha gwana po inawu dhanwa palandulathano molwaashoka uuti kawa li wa gwana.

Pahokololo lyaHenk Bronner, omulongisikola posikola yopombanda yaRundu’s Noordgrens , okwa ti ye opamwe naalongi aakwawo yatatu oya pewa omukumo nuupenda kuErwin Handura, a tseyika nawa onga omudhani gwohoki OmuNamibia ye omugandjimayele, ngoka muule woomvula odhindji a kala nokugandja omadhewulo gohoki lumwe momvula kehe moRundu.

Okuza mpoka oya kala yena omukumo opo ya tote po oliha yohoki yoosikola moRundu nosho tuu omahala galwe gopomudhingoloko noondjodhi dhawo osho dha tsu sho ya toto po oliha yina oosikola ne tadhi kutha ombinga ngashiingeyi.

Oliha ndjika oyina oongundu ndatu dhoomvula dha yoolokathana, odho kohi yoomvula12/ kohi yoomvula 14 nosho wo kohi yoomvula 16, ope na osikola yimwe yi na kohi yoomvula 18 tayi ki itaalela nosipana yokohi yoomvula 16 molwaashoka oyo ashike momudhingoloko yi na aadhani yokohi yoomvula 18. Omu na ashike okapale kamwe kokangwena moka tamu vulu okudhanenwa omaudhano omathimbo gamwe molwaashoka oko wo haka longithwa koosipana dhetanga lyokoompadhi moRundu.

Okapale kamwe hoka taka vulu okulongithwa oka kolongwa nosamende, hoka haya vulu okulongitha omathimbo gamwe ashike Bronner okwa ti kutya oyi ipyakidhila noku opaleka ehala limwe niimaliwa yawo yene moka ya dhilaaadhila opo yeli ninge nawa lyo li opalele okudhanenwa ohoki. Okwa gwedha ko ta ti ondjodhi yawo oyo ndjoka ya kale nuudhano waadhani taya zi kiitopolwa ya yoolokathana tawu dhanenwa moRundu. Okwa hala aantu ye ye e taya tala eitulemo nomukumo gwaanona moshitopolwa shaKavango.

“Aanona mbaka oyi itula mo unene na yamwe ohaya ende ookilometa odhindji taye ya ashike okutala noku idhewula. Eyakulo lyEhangano lyohoki moNamibia nOmina Supplies otali ka kwathela opo oondjodhi dhetu dhi tse”, Bronner osho a ti pehulitho. –Uuyelele umwe owa gandjwa ko Namibiahockeyunion

KuOtniel Hembapu

LEAVE A REPLY

Please enter your comment!
Please enter your name here