Algeria a gandja eyambidhidho lyiikulya ootona 31 omolwa oshikuku

0
179

WINDHOEK – Ondhila yopaukwiita yaAlgeria yoNational Popular Army (ANP), oya nambele pokapale koondhila kopaigwana kaHosea Kutako, yi na ootona 31 dhomakwatho gopantu gopaulumompumbwe ngoka ga dhilaadhililwa oku kwathela AaNamibia omolwa ondjala ndjoka ya etithwa koshikukuta.

Oministeli onkuluntu ano Prime Minister Ndokotola Hage Geingob oye mwenemwene a ka taamba ko omakwatho ngaka gaza ku Ambasanda gwaAlgeria ngoka e li le po oshilongo shawo moNamibia Lahcene Kaid Slimane. Yamwe mboka ya lip o ongaashi Amushanga gwOkabinete kaNamibia  Frans Kapofi,Amushanga ta kalele mombelewa yOministeli onkuluntu Nangula Mbako nosho tuu Omuwilikikuluntu moshikandjo shewiliko lyomaulumompumbwe [Emergency Management Unit],

Japhet Itenge nosho wo Amushanga-ndjayi gwomushigakano omutiligane moNamibia [Namibian Redcross]Dorkas Nepembe Haiduwa. Omagano ngaka giikulya oga londekelwe momaloli getanga lyegamneo lyaakwiita lya Namibia [Namibian Defense Force (NDF)].

 

Sho a  li ta popi pethimbo ta taamba ko omakwatho ngaka pambelewa, Ndokotola Geingob okwa holola euvonawa lye kaantu yaAlgeria ye ta dhimbulukitha AaNamibia onkandangala ndjoka ya dhanwa kuAlgeria pethimbo lyekondjelomanguluko ndjoka lya li ele lyo elulu. “Uukwaowanankali naAlgeria owa zi nale. Tse aanona yuukwaowanankali wopauyuni, na unene waAfulika. Sho osho nduno twa nyanyukwa. Eyambidhidho ndika otwe li taamba ko unene. Sho tamu shuna, alikana faleni elaka lyomapandulo kaantu yaAlgeria,” osho a ti.

 

Omukalelipo gwaAlgeria moNamibia Lahcene Kaid Slimane okwa ti eyambidhidho ndika olye ya “etokolo lya ningwa kuPelesitende gwoRepublic ya Algeria, Abdelaziz Bouteflika. Naashika osha ningwa omolwa uumwainathana nuukuume mboka wu li pokati kiilongo mbika. Molwa oku kwathelathana momaudhigu kwiilongo mbika, Algeria ota gandja nelalakano opo a kwathele mokukeelela omaudhigu mokati kaantu yaNamibia ngoka a dhengwa nayi komauwinayi agehe ngoka ga etelelwa konkalo yombepo ombwiinayi, “ osho a ti.

Ambasanda Slimane ota ti, omakwatho ngaka gopantu oku za ko Algeria oku ya kuNamibia, oge thike pootona 31 dhiikulya (olwishi, omagadhi, osuuka, oohi dhomoondooha, nomakoloni), odhongushu yiimaliwa yi thike poomilijona dhaNamibia10, na oga etwa koWindhoek nondhila onenenene yopaukwiita yaAlgeria.

“Ngaashi mu shi shi, Algeria naNamibia otaya tyapula ekwatathano lyopandjokonona lyo ewanawa. Keyambidhidho ndika, Epangelo lyAlgeria, tali wilikwa kombepo yekwathelathano lyiilongo iimwainathana, olya hala oku ulika uumwainathana woshili naNamibia methimbo ndika edhigu lyondjala onene muule woomvula 30.

Omauwinayi ngoka taga etwa konkalo yombepo ombwiinayi nelunduluko lyonkalo yombepo. Ekwatho ndika olyo ewanawa lyo endhindhiliko ewanawa lya hololelwa aantu yaNamibia kaantu yaAlgeria. Unene mokuyambidhidha mboka ya mona iihuna molwa oshikukuta , Ambasanda Slimane osho ta ti.

 KuFifi Rhodes

LEAVE A REPLY

Please enter your comment!
Please enter your name here