Dungu nondoongi dhe dha zala omalwaala goSWAPO

0
242

OKALONGO – Omanga AaNamibia oyendji haya munu oondoongi dhawo opo dhi pulule, oku gandja onyama nokulongithwa onga osheenditho, omukondjelimanguluko gwoomvula 53 ngoka e li oshilyo shoshili shongundu yoSWAPO, ota  monikitha nawa ondoongi dhe nomalapi gomalwaala gepandela lyaSWAPO.

Omuyambidhidhi tagu pumo gwaSWAPO nguka oha kala mOneheke mOshitopolwa Omusati.

Omutoolinkundana gwaKundana mesiku lyokudhimbulukwa omapendafule, okwa yi  koshikandjohogololo shaEtayi mOmusati na okwa mona oondoongi tadhi napa mOshana. Moothingo dhawo, odha tulwa omalapi gomalwaala gepandela lyaSWAPO.

Sho a pulapula nawa, aanamukunda yomOneheke oya ulikile Kundana kumwene gwoondoongi ngoka a hokolola edhiladhilo lye opo a zaleke nawa oondoongi 14 omalwaala gongundu SWAPO.

Festus Mwetupunga a tseyika nawa  “Dungu” okwa ti edhiladhilo ndika olya tamekele mo1989 popepi nemanguluko lyaNamibia mo1990. Osha li nduno omukalo gwoku uvitha ko aantu kombinga yuuwanawa waSWAPO opo a sindane momahogololo.

Mwetupunga okwa ti, oye gumwe gwomaantu mboka yali taya kondjitha omutondi okuzilila meni lyoshilongo pokati koongamba dhaNamibia naAngola pethimbo lyekondjelomanguluko nangashingeyi okwa yalulwa na okuli omukondjelimanguluko.

“Pethimbo ndjoka nduno mo1989,  oongundu dhoompilameno unene oDTA oyali haya mangele omapandela gawo komilunga. Oshali oshidhigu okulya oondunga dha za komilunga hoka kuna omapandela goongundu dhompilameno. OoHailwa mekondjo ooyakwetu yamwe, olyo nduno lya li ethimbo taya ningi iilyo yoongundu dhompilameno. Onda tokola opo ndi zaleke oondoongi dhandje omalwaala gongundu SWAPO nondedhi lukile aakondjelimanguluko nelalakano oku uvitha ko ooHailwa mekondjo mboka ya thigi po SWAPO opo ya galuke, “ Osho a ti.

Oondoongi dhe odhi na omadhina gaakondjelimanguluko yamwe ngaashi ooNdjeke Nopoudjuu, Kafinana KaAndili naMashina (gwo kolutenda) ngoka a lukilwa etulilo lyeshina lyokolutenda Moses Amweelo.

Okwa ti kutya okwa itaala kutya ngele a tula iimuna ye omalwaala gepandela lyongundu SWAPO, aantu oyendji mboka ya thigile po SWAPO otaya ka galuka.

Edhiladhilo lyandje olya nwetha mo nawa aantu oshoka yalwe oyendji oya galukile koSWAPO sho ya mono oondoongi dhandje dha zala omalwaala gongundu. Oyali ye uvite kutya noondoongi odhi li mongundu SWAPO, omolwashike nduno yo itaya galukile kegumbo (SWAPO)”, osho a ti.

Okwa ti iimuna ye mbika nando oyi kane, otayi dhimbululwa omolwa omalwaala gaSWAPO ngoka dha zala.

“Ngele odha kana e tandi ke dhi konga nande omo Angola mwii nenge ndi ke dhi igidhe moradio nenge ndi tseyithile kehe gumwe ngoka a mona oondoongi dhina epandela lyoSWAPO moothingo, tandi ti owala  na kwatathane nangame. Oondoongi dhandje ohadhi simaneke/salutile ndje uuna nde dhi lombwela dhi shi ninge,” Mwetupunga osho ta ti.

Ta gwedha ko ta ti, okwa tegelela ashike sigo oondoongi dhe dha gwanitha oomvula 18 opo nduno edhi zaleke epandela lyongundu.

Kepulo kutya oondoongi dhe ohedhi longitha mushike ishewe okwa ti, ohe dhi longitha okupulula pethimbo lyomvula.

“Ngele ondi wete kutya ethimbo lyomvula ewanawa dho oondoongi dhandje odha nyanyukwa, ohandi dhi uvitha nawa unene e tandi dhi landele omapandela omape molwaashoka odha longa nawa,” osho a lombwele Kundana.

KuAlbertina Nakale

LEAVE A REPLY

Please enter your comment!
Please enter your name here