Kaperu ta kunghilile omaudano eengonyo eheli paveta

0
281

Ovenduka – Hamushangadjai wEhangano lOudano wEengonyo la Namibia (Namibia Boxing Federation) Joe Kaperu okwa ninga ehololo madilaadilo neudo nai kombinga yehapupalo lovaunganeki vomaudano eengonyo vopaumwene , vena elalakano loku longekida omaudano eengonyo shihe li papitikilo lOlutupangeli olo lina sha noudano weengonyo moshilongo.

Ta popi poshoongalele shovatoolinghundana moshilando mEtine, Kaperu okwa popya yoo kutya olutu loudano weengonyo (Namibia Boxing Federation) olina eshiivo movanambelewa moitopolwa imwe moshilongo, ovo veli ovakufimbinga vomikalo doukahenakonasha pakulongekida omafiyafano oudano weengonyo pehena eefelo nekwashilipaleko lehangano, nande ongaho okwa yelifa yoo kutya ehangano lo NBF ita li ka tambula ko elihumbato lonai loludi eli shaashi otali nyateke efano loudano weengonyo moNamibia monakuiwa.

Kaperu, pehena oku kwataakwata, okwa ifana noku kunghilila ovanambelewa vomaudano eengonyo ovo tava longifa Edina lehangano lo NBF opo va xulife po oilonga oyo youlingilingi molwaashi oNBF ota i ka katuka onghatu oyo itaika fiya emanya la londa kulikwao monghendabala yalo oku kalekapo ehangano leengonyo li kale li na elandulafano  noundjolowele.

“Omalihumbato oludi olo itaa ka tambulwako navali naakale a mona exulilo. Eli olo ekunghililo layukilila kwaavo veli ovanambelewa vomaudano eengonyo ovo mopaife taveli yambapaleke okudilila momalwoodi eheli papitikilo, nomolwaasho nee omalwoodi oludi olo okwa tula eemwenyo dovadaningonyo moshiponga notashi dulu oku eta pondodo opo Namibia a kufwe mo pakafimbo molutu lopaunyuni lina sha nomaudano eengonyo .  Oshishiinda longo South Africa osha kufwamo pakafimbo omolwa omaunganeko omaudano oo kwali a kufa ombinga pehena epitikilo okudja kehangano” Kaperu a kunghilila.

Kaperu okwa indila yoo ovanambelewa vamonafane tete nEhangano lo Namibia Boxing Federation ngeenge vena ehalo lokulongekida omaudano eengonyo, molwaashi ope na oinima ihapu ina okutulwa moilonga omanga omaunganeko omaudano inaa tameka, ngaashi omauhaku, eameno, omafendelo, naikwao ilili nokulili.

KuOtniel Hembapu

 

LEAVE A REPLY

Please enter your comment!
Please enter your name here