Mannetti i ithana Heini Isaacks

0
210

……………Warriors a tokola a hulithe omaudhano nondondo yopombanda

 

WINDHOEK – Ricardo Mannetti, omugandjimayele ano “kootja” yosipana yopashigwana yaNamibia yetanga lyokoompadhi, oBrave Warriors, okwa ti ota ka kambadhala mpoka ta vulu opo a manithe omaudhano ngaka moka Namibia ineshi enditha nawa mokukonga ehala mekopi lyaFIFA lyuuyuni mo2014, nehokololo ta li uvitha nawa sho taka kondjitha osipana yahanawuka nayi yaKenya oHarambee Stars, muudhano wa hugunina tawu ka dhanenwa pokapale kopashigwana muNairobi mOsoondaha.

 

OWarriors otayi ka dhana yaana aadhani yamwe mboka oyo oongudhi metanga, itaya ka kutha ombinga molweendo nduka lwokuAfulika lyokUuzilo nashika osha etithwa kiiponga noko ku tidhwa. Aakwiita yaManettie nando ya dhengwa pomitima, oya tameke iilonga yoshili pethimbo lyomaidheulo moWindhoek pokapale koIndependence

Omudhani omukulu gwoBrave Warriors ye oNakuhole -iilonga omudhani gwopokati gwoSantos okwa holola omukumo neineekelo maadhani o-24 mboka e na. Ta popi ta ti, omalongekidho golweetho nduka olutiyali oge li lela nawa pakupopya oshili sho shene.

Nando oku uva uuntsa hako naanaa, oWarriors otashi vulika yi endulule uupendafule wawo womo1997 sho ya yile kuukongo ya nyanyukwa e taya yaha okalimba ano ya dhengele Harambee Stars 1-0 okupitila mokoola ya thangelwe shoshikuti sha pwako kuGerros Uri-Khob. Shoka osha etithile okuholoka kwotango kwoWarriors muudhano wahugunina wEkopi lyIigwana yaAfulika [African Nations Cup (AFCON)] mo1998 muBurkina Faso. OoWarriors odha tsikile nokudhenga Gabon pethimbo lyuudhano wa gwedhwa po moka okoola inayi monika nale yo yu ukilila ya tulilwe mo kuCongo Hindjou.

 

Aamati mbaka ayehe yaali, Mannetti na Ronny Kanalelo oyali aadhani kamana mosheendo shoka sha haluthile oonakuyogelela yashili aaKenya. Magnet okwa dhanene onkandangala ya simana sho pomathimbo nomathimbo a kala noku ningitha AaKenya ya ndwangulile etanga moopala nashika osha li egameno enene tali tulitha oomwenyo pomahala mOlyomakaya ngoka gopandjokonona muNairobi ya li ya pupyala nayi.

“Kandi na omalimbililo momutima gwandje ondi ineekela nonda nyanyukilwa aadhani mboka ndi na ngashingeyi. Shika otashi ka holola wo kutya ota tu koko molwaashoka osheendo shika osha yelutha omaako gasho pombanda e ta shi uvaneke kutya otapu ka kala etanga tali dhanwa moshili oshikando shika. Ohashi kala aluhe  etokolo edhigu okuthiga po aadhani yamwe e to eta mo yamwe aape, ashike pehulilo, ondi na ongundu ndjoka ndi ineekela kutya otayi ka longela kumwe nawa nomonkalo ndjika yokukambadhala,” Mannetti osho i inomo.

Okwa gwedha ko ta ti yamwe yomaadhani ye haya kala kiilongo yopondje kaye mo mosheendo muka omolwa uuyehame noku tidhwa. Ashike okwa gwedha ko meendelelo kutya, sho inaaya kwatelwa mo molweendo nduka itashi ti kutya ando itaya ka ithanwa we komaudhano gokomongula. “Oye li natango oshitopolwa shosipana yopashigwana na uuna ye na ethimbo lyokuhogololwa, ota tu ke ya yambidhidha e tatu kambadhala tu ya galulile mo mosipana. Ashike mongashingeyi, elalakano lyetu oku hulitha omvula pandondo yopombanda pethimbo lyomathigathano po ngaka opo nduno konima tatu ka tala kutya momaudhano gopaukuume otatu ka dhana ngiini.

Osipana yoBrave Warriors oya yi koNairobi mEtine moshiike shika. Ye li pomuthika omutitatu miitsa itano mongundu oF-yiilongo ine, oWarriors otaya ka kambadhala opo ya ye pehala etiyali taya dhiladhila kutya mwene gwomatanga Nigeria, otaka dhenga mo Malawi pethimbo lyuudhana womoNigeria mOsoondaha. Namibia ota yi muudhano a manguluka sho a dhanene nawa okuyeleka naKenya molweetho lwotango moWindhoek petameko lyomvula ndjika. Otaya pewa wo omukumo kushoka kutya, oya dhengele nale Harambee Stars pehala olyo tuu ndyoka konima yoomvula 15 dha piti, oku popya nee oshili yoyene

Iilyo o-24 tayi landula mpaka oyi li ngashingeyi momaidheulo moka omwaalu gwaadhani tagu ka tulwa sigo aadhani 18. Omadhina ogo: Efraim Tjihonge, Virgil Vries, Max Mbaeva, Larry Horaeb, Chris Katjiukua, Riaan Cloete, Dudes Mwedihanga, Pineas Jacob, Sadney Uri-Khob, Denzil Haoseb, Tuhafeni Pekka Hamukwaya, Ananias Gebhardt, Neville Tjiueza, Dennis Tjetjinda, Freedom Puriza, Deon Hotto, Emilio Martin, Marko van Wyk, Willy Stephanus, Jerome Louis, Kumbee Katjiteo, Petrus Shitembi na Heini Isaacks.

KuCarlos Kambaekwa

 

LEAVE A REPLY

Please enter your comment!
Please enter your name here