Okuza koChina okuya kuAfrica nombasikela

0
208

WINDHOEK – Omunamimvo omilongo heyali nambali Fengyan Du okwe ende olweendo lwookilometa  dhi thike pomayovi omathele omilongo ndatu nagatatu nomathele gatano (33,500km) okuza koChina okuya ku Africa a londa kombasikela muule woomvula mbali. Du okwa tamekele olweendo lwe momasiku 25 ga Aguste, 2011 nokwa thiki moNamibia momasiku 15 ga Aguste, 2013.

Pahapu dha Du okwa taaguluka iilongo yi thike lwopomilongo 21, yimwe yomuyo okwa kala mo okathimbo nokwa longa mo wo iilongayakulo. Okwa longa ongomulongisikola mo India mosikola hayi ithanwa Orphan School. ’’Onda kala nale ndina ondjodhi yoku enda muuyuni nomomumvo 2007 onda tameka okugongela oshimaliwa opo ondjodhi yandje yi tse manga inandi tameka oshinakugwanithwa  shomutungagumbo,” Du osho a popi.

Pethimbo lyolweendo lwe okwi iyadha monkalo moka ita vulu okumona olukalwa lwokukala, nokwali a kala moosikola, moongeleka nomoofaalama nokuli. Okwa longo iilongayakulo opo a mone iikulya nehala lyokulala. ”Mu Egipiti onda landula ongundu yaapashioni mboka ndali nde ya kwatha okuthaneka omafano nokukwata uuvideo, molwokupewa iikulya nehala lyokukala opo ndi hupithe uumaliwa wumwe ,” osho a popi.

“Osha li ompito ombwaanawa noonkondo kungame oku ya momikunda nokukwatathana naantu. Onda tsakaneke aafuthi mu Ethiopia, kakele inaa kutha ndje nando osha, shoka nda ningi po okuya ulika ashike nokutala kuyo oyo noya tila, taya dhilaadhila kutya ondina oonkondo  noya ningi ookuume kandje,’’ Du ta fatulula.

Okwa tsakaneka iinamwenyo ya yooloka, embungu olyo lyali lya nika oshiponga unene ashike, inali mu ninga sha.

‘’Onda hogolola okweenda kombasikela molwaashoka oshi li oshipu okweenda nayo, itashi futwa sha, otandi vulu okuthikama kehe mpoka  nda hala nokwiilonga iinima oyindji mondjila,’’ Du tati ngoka a longitha shi thike lwopoodola dha America omayovi gatano (5000 US$), olweendo lwe aluhe.

Du okwa lombwela oshifo sho New Era kutya ota ka ya koSouth Africa ngele a mono ombapila yomapitikilo golweendo o (Visa) na otaka shuna koChina a ka longe ye a ka gongelele olweendo lwe talu landula, ndoka ta thaneke lu ka kale kuAmerica yokuumbangalantu nuumbugantu.
KuSabina Elago

LEAVE A REPLY

Please enter your comment!
Please enter your name here