Omuhondji woikutu omunyasha teli longele ye mwene

0
221

ONGWEDIVA – Komuhondji woikutu eli pamufika muwa, ongeshefa yoidjalomwa yopashinanena otayi dulu okukala iwa notayi nyakula. Ashike komuhondji woikutu wongaho, ongeshefa eyi oyina omafiyafanopo a kwata moiti nelongifo lomadilongo a ya pombanda.

Omuhondji wOikutu womunyasha  womOngwediva, Penny Nghifikwa otati oshidjuu neenghono kovaningi voikutu oku ulika  oidjalomwa oyo va longa. Sho vali oilonga yavo inayi talika ko ongoilonga.

“Ohatu ulike ashike oihondjomwa yetu pomatala, apa hatu  hondjele,  novanhu kevahapu have uya kombinga eyi. Meemhito dihapu oihondjomwa yetu oyina ombiliha  ashike ngeenge kapena ou e kushi, oinima yoye itayi landwa,’’ Nghifikwa tati.

Nghifikwa okwe uya mongeshefa yokuhondja eshi a li a kutwa pofabulika yokuninga oikutu,  fiyo a tokola opo a tote ongeshefa yaye mwene.

‘’Okudja eshi nda tameka ongeshefa yange mwene, onda kala handi longo neshikulafano lange mwene nounghulungu yoo wa hapupala.Nonande luhapu ihaku kala omaulikilo oidjalomwa kombinga eyi, osho itashi kwata nge moshipala ndi ha longe osho ndi hole. Ondina elineekelo kutya  limwe lomomafiku oilandifomwa yetu otayi ka ya pombanda,’’ osho a tonga.

Okwati kutya okulandifa oikutu mepandavanda  otashi pula eitulemo  lokulandifa,  osheshi omuna ovalandifi vahapu ovo tava landifa oidjalomwa yelifa.

Oikutu ihapu yopamifyuululwakalo ohayi longwa apa, ashike eemhatolona oda yoolokafana. Ovalandi ohava dulu okuhokwa oikutu yamukweni shi dulife yoye. Okungeshefa otaku pula  shihapu apa.

Nghifikwa okwa denga vali omufindo pomudingonoko woilonga opo ta longele nokutya, oilandifomwa yaye inayi amenwa shaashi tava longele pomatala.

‘’Omafimbo amwe ngeenge okuna omhepo ile taku lokwa oinima yetu ohayi lokwa, ndee hatu shitopa okulonga pakafimbo na itatu mono oshimaliwa shasha,’’ osho a tonga.

Oha hondjo eefulukweva da yooloka da hondjwa noiyata yomaludi a yooloka, oikutu yopamifyuululwakalo,  oudjalifo,  oumbidja, omalapi opomakende ilo keshe eshi omulandi a hala okuhondjelwa. Eendado daye oda tameka pefele nomilongohetatu fiyo opomafele atatu nomilongo itano.

Nghifikwa otati oilonga yavo inayi kala nande ipu na unene nee paife eshi ovanhu tava yi komaulikilo opaipindi,  halo naana efimbo lefudepo.

‘’Omaulikilo opaipindi oo omhito iwa kufye tu ulike osho tuna, osheshi ovanhu aveshe vadja keembinga neembinga doshilongo otave uya okutala oilonga yetu nokutuyambidida.  Oshoyo ovaningi aveshe voidjalomwa noilongomwa  otava shakene  nokutukulilafana omadilaadilo nghee vena okuya komesho,” osho a tonga.

 

KuSelma Neshiko

LEAVE A REPLY

Please enter your comment!
Please enter your name here