Omukiintu a mona he ngoka a kanene konima yoomvula 44

0
2750

MASHARE – Omukiintu omunamimvo -56 ngoka  a kanene uule woomvula 44 okwa tsakanene ishewe naakwanezimo lye, shoka sha kutha po uumbanda mokati kaakwanezimo wokutya okwa mana oondjenda dhe nale.

Moshiningwanima shika sha fa ondjodhi, sha li tashi lilitha sho tashi nyanyudha, Maria Sipopa Mbendeka osho a mono he naamwayina yamwe oshikando shotango moMashare hela e ya monene mo1969 , omukunda gu li ookilometa45 kuuzilo waRundu.

Mbendeka sho a li e na oomvula 12,okwa thigile po omukunda gwawo Simanya – gu li ookilometa 150 muuninginino wOshitopolwa shaKavango West.

Okwa falelwe moshishiindalongo Angola komulumentu gumwe Omuputu opo a ye a ka kale ha dhana naanona yane yomusamane ngoka omanga ye a thigala moNamibia.

Maria okwa galukile kaakwanazimo lye naanona yaheyali, osheeli oshi na oomvula 38, aanona ayehe mbaka he omuAngola

Yamwe yomaakwanezimo oya ende uule wookilometa 160 okuza moRundu okuya koongamba dhaNamibia na Angola poKatwitwi. Elalakano okutaamba ishewe omukwanezimo nguka a li a dhimbiwa, uuna a taagulukile moNamibia.

Yina yaMbendeka, Yintumba Mbendeka, okwa ziminine ngaa opo omulumentu nguka Omuputu a ye nomonakadhona koAngola. Ashike, he, Augustinus Mbendeka, kali a tseyithilwa nando, pethimbo ndyoka okwa li ta longo koGobabis.

Tate Augustinus Mbendeka, he yaMaria Sipopa kali e shi oku shi hokolola molwaashoka a mona omonakadhona gwe e na omwenyo ngoka e mu kongo nale, ndele, ineshi pondola. Okwa nyolele oombaapila e ta tseyitha lwiikando oyindji momahala ga yoolokathana moAngola opo a tseye ando mpoka e li.

Augustinus Mbendeka okwa lombwele aatoolinkundana mOmaandaha ta ti, iita mbyoka ya li moAngola oomvula odhindji, oyo ya ningitha olukongo lwomonakadhona oludhigu, molwa omaupyakadhi giita, osha li shina oshiponga oku talela po oshilongo shoka.

Okwa ti kutya onkundana yokutya omona okuna natango omwenyo na oku li ngaa lwaahoka moAngola moWambu, okwe yi kundana omvula ya za ko. Konima sho Maria a monene aantu ya za koNamibia, mboka e ya pula ngele oye shi he gwedhina Mbendeka.

Elago enene, ongundu ndjika yaaNamibia oyi shi omulumentu ngoka ta popiwa. Yo oyo nduno ya kwathele moku kwatakanitha pokati kahe nomonakadhona ngoka a kana nale.

Augustinus Mbendeka,  e na uuvu wuulepela,okwa pandula Tate Kalunga molwashoka e mu longela “iilonga-kumithi” na ota indile aantu opo yi ineekele muKalunga noohapu dhe molwashoka otadhi ningitha iinima yi ningwe mbyoka ya li itayi vulu okuningwa.

Maria ngoka ta monika lela a enda omwenyo,okwe ya pamwe nomwananamati omutitatu gwoomvula 33, Erigues Neves a valelwa moAngola, okwa hokololele aatoolinkundana omanga ta zi omahodhi ta ti kutya,kali a tegelela a adhe he e na omwenyo. Yina, okwa mana nale oondjenda dhe  mo 2010, ashike opo owala e shiuvila mpoka sho a monathana naakwanezimo mbaka.

 

Maria, ngoka ha popi ashike omalaka gokoAngola, ota dhimbuluka po ashike aanona yane maanona yahe yahetatu, molwashoka yakwawo yane oya valwa manga ye ke po.

Okwa hokolola kutya ota kala po ngaa naakwanezimo mbaka uule woshiwike, nokonima opo nduno taka shuna koAngola a ka longekidhe okugaluka ye a kale po wo ethimbo ele.

Molwa etsakaneno ndika lyaanegumbo, aanamukunda naashiinda oya mbombolokele pegumbo lyatate Mbendeka opo ya tale omukiintu ngoka a li a dhimbiwa kaanegumbo  eta ya ti kutya okwa sa nale. – Nampa

LEAVE A REPLY

Please enter your comment!
Please enter your name here