Oombwanawa kadhiningi oonde.

0
294

Pehala lyOshitopolwa shOshana, otandi pandula Elelo lyOshifo sho New Era, shoka sha etapo, “Kundana”, Oshifokundaneki mElaka lyOshiwambo. Otandi indile ndamanamo, tu kutheni ombinga okugandja omadhiladhilo getweni mOshiwambo mOshifo shika.

Oshasimana noonkondo, tundungikeni oshigwana shetu minima yina sha nomahumitho komeho, omithigigululwakalo, emona lyOshilongo shetu Namibia, iinima mmbyoka yanyenga onkalamwenyo yetu, oshigwana, aanyasha, oomeme notate. Tugandjani omadhiladhilo getweni, nkene tuna okutunga onkalamwenyo ombwanawa moshigwana.

Natwiipulakeneni pambepo yuumwayinathana, tukale oshigwana shina ombili, shaputuka sho shasimanekathana, naanyasha yetu ya simanekathane yo yasimaneke wo aakuluntu naaleli yawo ayehe, yopapolitika, aaleli yopashigwana naleli yopambepo.

Kundana” Oshifo shOshigwana mOshiwambo.  Otandi indile, aashangi melaka ndika tu kwatelenipo oshifo shika, tse tukundanekeni oshigwana, tushilongeni iinima mbyoka tayi tungu.  Aashangi yomambo melaka ndika gandjeni omadhiladhilo-longo pukululeni oshigwana naaleli yasho. Natuningeni oshigwana hashilesha, tse tu ilikolele uunongo owindji mboka tawu tukwathele wo ta u ndungike oshigwana nkoka tuuka.

Oshigwana shoka ihashi lesha, otashi monika oshigwana oshithigona muunongo,  oshoka uunongo noondunge odhindji odhapungulwa miishangomwa.  Kundana naninge onzo moka tatu pewa tse tatu gandja wo uunongo noondunge moshigwana.  Kundana nakale ewi lyoshigwana mokati ketu,  shoka tatu ngeshefelemo nokgandja omayiuvo getu kEpangelo, kaawiliki yetu momOshigwana kwaamboka hatu uuvu eleka ndika.

Oomeme, ootate naanyasha, otandi simaneke shoka tamu tumu iinyanyangidhwa yeni mu Kundana.  Omandungiko geni mondjila yokuthika kOndjodhi yEpangelo momvula 2030, otandi ga taambako tse tatu tungileko opo tunane oshigwana mondjila ombwanawa.

Namibia oshilongo shUudemokoli, otuna uuthemba wokushanga mEkotampango lyoshilongo shetu.  Natu tungeni oshilongo pomadhiladhilo ta tu gandja kepangelo lyetu naawiliki yalyo.  Natu shambekeleni nomaako agehe okuyapo kwOshifo shika Kundana.  Inatu kala ashike tatu nyanyangidha momalaka gomakwiilongo tse tatu ethapo elaka lyetu.  Oshigwana kashina elaka lyasho, osho oshigwana oshidhinwa muuyuni auhe.  Shika osho Ekotampango lyetu lyasimaneka omalaka gaavalelwamo moNamibia.

Ompito yokunyanyangidha iinyolwa yetu oya mbwalangandja mu Kundana, oshifo shOshiwambo mOngwediva.  Ompito ndjika nayilongithwe tu tungathanenei melaka ndjoka hatu popi nohatuuve nawa.  Oombwana ihadhi ningi oonde, ompito oyeni shigwana.

 

 KuClemens Handuukeme Kashuupulwa

 

 

LEAVE A REPLY

Please enter your comment!
Please enter your name here