Uulalelo woku kwatakanitha wOshitayi shoNCCI moNooli owa adha oshilalakanenwa

0
164

ONGWEDIVA – ONamibia Chamber of Commerce and Industry (NCCI) oya ti kutya uulalelo wokukwatakanitha woshitayi shokuumbangalantu owa dhenge mo omadhilaadhilo agehe gaambyoka yali ya tegelelwa. Shika osha etithwa kashishi ashike ando ko kutya OmuPelesitende Hifikepunye Pohamba nomunyekadhi meekulu Penehupifo Pohamba, nosho tuu Omukokoli Pelesitende, Ndokotola Sam Nujoma oya li ya thika, ndele nooyene naakalelipo yoongeshefa ye vule 350 yomomudhingoloko noyopondje oya thikile. Sho osho sha etitha esindano mushika.

Pa longekidho lyoshitayi shoNCCI shokoNooli nosha ningilwa pOshiputudhilo shOpombanda shaNamibia [University of Namibia-UNAM]pendiki lyaHifikepunye Pohamba mOngwediva, etsakaneno ndika olya li tali lalakanene okugandja ompito yoku kundathana noku topolelathana omayele pokati kaaniilonga yopaumwene noyopapangelo nosho tuu oku ulika nkene ye na okulongelakumwe nokukala muukumwe mokulwitha omaupyakadhi ga taalela ehumithokomeho paliko lyoshilongo nomauwanawa gaNamibia.

Oshinenenima shetsakaneno ndika, osha li wo okutyapula oshituthi-dhimbuluko shevalo lyOmuPelesitende Pohamba sho a gwanitha oomvula 78. Naasho ye mwene a tokola okwa ti, pehala lyoku longitha iimaliwa tayi futu omahaleloyambeko miifo, shapo aanangeshefa naya gandje koshikefa tashi ifanwa President’s Charity Fund-ano Oshiketha shaPelesitende shokukwathela , oshitayi shoNCCI koNooli osha gongele miimaliwa nosho tuu miinima yoyene shi thike poodola dhaNamibia omilijona1.2.

Ndhoka dha li oonani dhokomeho, odho oongeshefa dhi li mOshikango, International Commercial Limited na Ezzy Import and Export, kehe yimwe oya uvaneke yi gandje oodola dhaNamibia 100 000, tadhi landulwa ku NamPower noodola dhaNamibia 78 000 na Jack’s Trading na Chicco Group kehe gumwe oodola dhaNamibia 50 000. Omunashipundi gwOshitayi shoNCCI moNooli, Tomas Iindji, okwa yelitha kutya oshiketha shika shaPelesitende shokukwathela osha totelwe konima yomvula ya piti. Elalakano olyo okuhwepopaleka onkalo yopankalathano nokugandja omauwanawa kaathigona, ku mboka ya hepekwa naamboka ye li konima pahumokomeho miitopolwa ayihe 14 momidhingoloko dhetu.

Pethimbo ta popitha aanamutumba mbuka, Omutse gwoshilongo okwa pandula unene oshitayi shoNCCI shokoNooli nosho tuu aanangeshefa ayehe kuumbangalantu omolwa okugandja kwawo. Ye ta ti, oya holola shili eitulemo lyawo moshinakugwanitha shokukwathela, onga aanangeshefa ekwatho lyawo otali tungu notali etitha po omudhingoloko nenge oshigwana tashi kwathelathana.

OmuPelesitende Pohamba okwa fatulula wo kutya enene dhiladhilo lyoshikefa shika olya lalakanena elongo li li pondondo yopombanda pakugandja iimaliwa yoku futila aalongwa omailongo gawo nosho tuu pa ku kwathela momukalo gwontumba nenge gwongandi kaanona mboka ya pumbwa ekwatho.

Sho a popi momumbwalangandjo, OmuPelesitende okwa kwashilipaleke aanangeshefa yokoNooli kutya Epangelo olyi itula mo mokugandja omudhingoloko gwokungeshethela wa gamenwa gwo ogu li nawa. Nashika otashi ningwa tashi pitile moompango tadhi opalele, okutunga iinima tayi nawapaleke omangeshethelo nosho tuu oku kaleka po omakwatathano omawanawa.

Lwanima pethimbo lyuulalelo woku kwatakanitha, Omukokoli Pelesitende, He yoshigwana shaNamibia Sam Nujoma okwa gandja omapapa kuutayi uushona woNCCI , Oshakati osha tumbalekwa molwaashoka osho tashi koko nawa, Ondangwa oyi na omakwatathano omawanawa naHelao Nafidi omuunganeki omwaanawa. Endiki lyaUNAM lyokoNooli lyaanangeshetha aashona olya pewa woe papa lyokulongelakumwe nawa naanangeshetha.

 

Komunambelewa Omuukundaneki

LEAVE A REPLY

Please enter your comment!
Please enter your name here