Amutse ta undulilwa oshilema

0
277

OUTAPI – Omukuluntu gwoshikandjohogololo shaShikuku omusimanekwa Modestus Amutse, okwa lulilwa konkalo yaakalimo yomOshitutuma,  mboka yahala oku muundulila oshilema shezimo lyawo oshoka ngoka ali teshi sile oshipwiyu okwa hulitha oshiwike shaziko.

Omusimanekwa Amutse okwa lombwele Kundana pamapulapulo mongodhi kutya omukulupe Patricia Shimoshili oye a li omutekuli gwoshilemakadhona shoka , ihe ngashingeyi kapuna ngoka ahala oku kala nasho nonando ohashi tambula oshimaliwa okuza kepangelo kehangano lyaakulupe, oothigwa niilema.

Amutse okwa ti okwa dhengelwa oshiwike sha ziko, komupeha gwa mwene gwomukunda noshowo kaakwanazimo kutya, okuna omukululpe gwomimvo 90 a mana oondjenda ashike okwa li ha sile  omukadhona gwoshilema oshimpwiyu na ngashingeyi kapuna ngoka ta ka kala te musile oshimpwiyu  nemwiileko emufale kepangelo.

Pahapu Kazimba omunamimvo 18 okwa valwa oshilema e na uulema mboka ihau penduka nande oku li ashike a lala, aakuluntu ye oya tetekela nale muukwaluhe eta thigwapo na yinakulu ngoka a hulitha Metitatu lyaziko.

“Ngame oshilema inandi shitambula oshoka kandi na mpoka tandi shitula, onda tegelela oku monathana nomalenga omanene opo tu tale kutya atu ningi ngiini,” Amutse tati.

Amutse okwa lombwele Kundana tati aakwanezimo oye mupula aka taleko oshilema shika oshoka omuntu kehe ogwepangelo, yo aakwanezimo inaya ilongekidha oku kala noshilema shoka.

Pakukwatathana nomupeha gwamwene gwomukunda Oshitutuma, mUukwambi moshitopolwa shOmusati, Paulus Tshaanika okwa ti onkalo oya nkundipala lela noonkondo oshoka kapuna ngoka ta vulu oku kala noshilema shoka mezimo alihe.

Tshaanika okwa ti egumbo lya nakusa moka muna oshilema shoka ngashingeyi, olya thigululwapo ko kamati okashona lela okamwayina ka kakadhona ngoka avalwa nuulema, ha ka hiti osikola pOshitutuma ,na itaka vulu okukala namukwawo ngoka ena uulema oshoka okwa pumbwa esiloshimpwiyu lyagwana.

Omupeha gwa mwene gwomukunda okwa ti okwa hala ngoka eshi omatindi haga ungaunga naantu yena uulema giileko omukadhona nguka oshoka ota kamona iishuna noonkondo.

Amutse okwa ti okwa tegelela okuka tsakanena naakwanezimo noshowo omalenga omanene meendelelo omanga ina pu holoka uupyakadhi.
KuLoide Jason

LEAVE A REPLY

Please enter your comment!
Please enter your name here