DPMT ya tameke okutunga etungo lyoSulphuric acid koobiliona 2.3

0
173

TSUMEB- Minista gwiikwamina niikwankondo, Isak Katali okwa tula miilonga limwe lyomomitungilo ominenenene dhomomitungilo omiwanawa moNamibia. Etungo ndika tali ka tungwa lyomitungilo omiwanawa lyongushu yoodola oobiliona 3,2 ota li ka tungilwa oshimeetela shongopolo shaTsumeb metonatelo lya Dundee Precious Metals (DPM).

Oshituthi shika shopambelewa shokusinda omutungilo gwetungo, osha holola etameko lyiilonga pambelewa lyetungo ndika tali ka tungwa uule womvula. Opolojeka ndjika otayi lalakanene   oku kutha po uudhigu mboka hawu etwa kosulfuri tayi zi moshimeetela uuna iitenda tayi yenyekwa.

Iilonga yo yene yokutunga, oya tegelelwa opo yika pwe pehulilo lyaSepetemba na oya tegelelwa yi gandje oompito dhiilonga kaantu ye vulithe 600 na ishewe uuna iilonga ya pu, aantu 50-60 ya pyokoka nawa otaya ka kutwa e taya kala aaniilonga taya kalele.

Moshipopiwa shaPelesitende Hifikepunye Pohamba shoka sha leshwa pehaIa lye ku Katali, okwa ti, ota tumbaleke noonkondo oDundee molwa “omathanekodhiladhilo gawo gethimbo ele nethimbo efupi goku gamena omudhingoloko. Ondungedhiladhilo niilonga mbika oya simana oshoka molwa shika, iimaliwa oyindji otayi ka longithwa paku humithakomeho eliko momudhingoloko”.

“Onda pandula Dundee Precious Metals sho a eta po oompito dhiilonga kaantu okupitila moku pungula moshilongo shetu. “Ndika olyo epungulo ewanawa nonde li taamba ko oshoka muule wethimbo ele, otali ka kwashilipaleka moku gamena noku tsa omukumo aantu opo ya gamene omudhingoloko” oshipopiwa shaPelesitende osho sha leshwa ngaaka.

 

Minista okwa holola ishewe oku uva nawa kwe kuDPMT sho i itula mo mokugamena nokukaleka nawa omudhingoloko naantu yagwo. Nosho tuu sho i iyutha komatokolo gepangelo gena sha nokugamena nokukwatela po uukolele waantu nowomudhingoloko shoka shali sha nyenyetwa kaaniilonga naakalimo yaTsumeb.

“Elalakano lyepangelo olyo oku eta po oompito oombwanawa dhokulongela opo aapunguli ya longe monkalo ombwaanawa moshilongo nosho wo oku kwashilipaleka kutya oongeshefa otadhi longo meni lyoompango nomalandulathano goshilongo sha Namibia, unene tuu mokugamena omudhingoloko, omakwatathano omawanawa gopailonga, nuukalinawa negameno lyaantu”.

Ngele tatu popi twa dhiladhila omudhingoloko, ehala ndika lya dhiladhilwa li nwepo lyo li keelele uuvu okuya kaantu, okwa dhiladhilwa kutya otali ka kutha po uupyakadhi womuku nenge ombundu ndjoka hayi zi miitenda e tayi etele aakalimo uvu na shika osha kala uupyakadhi okuza ngaa petameko lyoshimetela sho sha tamekele mo1963. Shampa lya pu, ehala ndika okupitila momashina galyo otali ka taamba e tali lundulula osulfuli dioxide [sulphur dioxide] oku yi kutha momutungilo gwoshiponga e tayi yi lundululile moshinima shina oshilonga tashi ithanwa sulphur acid shoka tashi ka landithwa komahangano goUranium opo gaka longithe miilongomwa yago.

Ngashingeyi, omahangano ngaka ohaga kutha osulphuric acid ndjika kiilongo yopondje. Ehala ndika otali vulu oku ka eta po osulphuric acid yi thike pootona 270,000 sigo 340 000 komvula.

 

Ngoka a popi wo pethimbo ndjoka, omupelesitende gwaDPM ngoka opo ashike a pelwe oshipundi shoka, ye oye wo omukuluntuwiliki Risk Howes, ngoka a tsu omuthindo kutya konyala oomvula omilongo ntano dha piti sho oshimeetela sha tameke iilonga yokulonga iikwamina tayi zi komina yaTsumeb. Ashike momukokomoko gwethimbo, ehala ndika olya kala wo momake goyene ya yoolokathana nopomathimbo gamwe nokuli osha kala oshidhigu nosha etitha opo konyala iilonga yi pate.

 

Howes ota gwedha ko tati, omolwa ashike okupitila mokulonga nuudhigini noneitulemo lyaantu oyendji nashika osha hupitha oshimeetela.

“Otwa itaala lela kutya shoka sha ningitha ehangano ndika opo li kale li iwetikile, omolwa ongushu ndjoka yi ikwatelela kuuntu nokesimaneko, eitulemo muukalinawa nuundjolowele, esiloshimpwiyu lyomudhingoloko, okulonga pauyuki, okupungula momudhingoloko nokuhwepopaleka ethimbo kehe. Iitya mbika, oyo tatu longo nayo yo tayi holola iilonga yetu yo oyo naanaa ya kwatelwa meuvaneko lyoshilimbo shetu, ‘ohatu sindana molwashoka otuna ko nasha’.

Howes okwa tsikile ko ishewe ta uvaneke kutya, “Otwa hala okulonga nawa naakuthimbinga ayehe mwa kwatelwa, omahangano inaaga yama kepangelo, omahangano gaaniilonga, epangelo nosho wo aanangeshetha yopaumwene opo ashike tatu adha omauwanawa gaantu ayehe”.

Ndokotola Peter Weber, omunambelewa omukuluntu mehangano lya tseyika nawa  lyopautekenika, Outotec, ndyoka olyo lya pewa iilonga yokutunga ehala ndika, okwa gandja wo uuyelele kombinga yomutungilo, uutekenika niinima ya pamba omudhingoloko yetungo ndika.

Outotec oye e li komeho muuyuni mokuthaneka omitungilo nosho tuu mokutunga omahala ngaa  ndika ye otaka kala wo e na oshimpwiyu shopautekenika, oku eta iilongithomwa nosho tuu okutala kutya etungo otali tungwa tuu pamulandu ngoka ogwo gu li mondjila.

Oshiwike shika, omukuluntuwiliki gwaDundee, Howes opamwe naawiliki ooyakwawo yaDPM oya tsakanene noMinista onkuluntu, Ndokotola Hage Geingob opo ye mu lombwele kombinga yaashoka sha longwa po kuDPM okuza petameko lyo 2010

 

Ku Engel Nawatiseb

 

LEAVE A REPLY

Please enter your comment!
Please enter your name here