Edhimbuluko lyesiku lyomapendafule lya eta oompata mOpaliamende

0
217

WINDHOEK –  Omuprima Minister Dr Hage Geingob okwa tindi noku ekelahi omapopyo kiilyo yimwe yoongundu dhoompilameno kutya epangelo olya kuthako omasiku gopashigwana onga iigongi yoSWAPO. Pethimbo lyomapulo gopakathimbo megumbo lyopashigwana mEtiyali lyoshiwike shika, omupresident goCoD Ben Ulenga okwa popi kutya oshituthidhimbuluko shesiku lyomapendafule kOmugulugwombashe moshitopolwa shaMusati shoka shali shaningwa omasiku gaziko, oshali shaningwa onga oshiithanene shongundu ompangeli noyendji yomaaleli yoongundu dhoompilameno kayali yahiwa.

Ulenga okwa pula Omuprima Minista opo afatulule kutya omolwashike aawiliki yoongundu dhoompilameno ina ya pewa uukalata wehiyo na omolwashike oyendji yomaaleli yopashigwana mwakwatelwa oominista dhimwe yali ya zala omizalo dhongundu yoSWAPO poshiithanene mpoka.

Mokuyamukula kwe, Geingob okwa fatulula kutya omi 26 gaAguste olyo esiku lyomapendafule ngaashi shali shatokolwa, nelalakano lyokusimaneka omapendafule gekondjelomanguluko lyoshilongo. Okwa ti omanga aantu yali muupongekwa, esiku ndika okwa li hali dhimbulukikwa kiigwanahangano (United Nations) onga esiku lyaNamibia ashike konima yemanguluko oshali shatokolwa opo esiku ndika liningepo esiku lyopashigwana. “Kandishi kutya oompilameno oha dhi longo ngiini, omathimbo gaziko okwa li nda hiya iilyo ayihe yoongundu dhoompilameno yiye kOmuthiya, ndali nde shiningi pamukalo goku ya shangela oombapila, ihe ondali owala ndamonoko omusimanekwa Hidipo Hamutenya naClara Gowases. Oyendji ina ye yako yo ina ya gandja nande eipopilo lyasha…” Geingob ayamukula.

Geingob okwa ti omasiku gopashigwana ngaashi Esiku lyOmapendafule omasiku geli mokaliindeli no inagapumbwa ehiyo lyasha, oshoka oshili oshinakugwanithwa shomuNamibia kehe oku kala piituthi yomasiku ngoka. Okwa fatulula tati, nuumvo opwali puna iinima iyali pOmugulugwombashe. Shotango oshali okupititha pambelewa ekotampango lyongundu yoSWAPO, konima shokwali kwa ningwa omalundululo pethimbo lyoCongress yagwedhwapo oomwedhi dhaziko. Oshitiyali osho ihe shali oshiithanene shesiku lyolyene (lyomapendafule). Ashike okwa yelitha kutya iinima mbika oya li ya ningilwa pomahala gayookola, nepititho pambelewa lyekotampango lyoSWAPO olya li lya ningwa tango omanga oshiithanene shesiku lyomapendafule inaashi tameka.

Geingob okwa li eekelehi omapopyo gaUlenga kutya opwali aantu yazala omizalo dhoSWAPO, onga iifundja iitokele tapula Ulenga opo ahulithepo okuninga omapopyo gaafele shoka eshi takalako onga ekongo lyiitsa yombiliha mopolotika.

Ashike Ulenga kali ahala okwiitala shoka shapopiwa kOminista onkuluntu, na okwa li aganeke oshikaha ishewe opo agwedhepo omapulo galwe. Oshinima okonyala shi ete oompata megumbo esiku ndyoka, ashike Omupehanashipundi gwegumbo lyopashigwana Loide Kasingo okwa li atindi okupa Ulenga ompito yokupopya, nokwa tokola kutya oompata dholudhi ndoka nadhi hule, naangoka ahala okupopya kombinga yoshinima shoka okuna oku tegelela esiku limwe.

Egumbo lyopashigwana olya li ihe lyapitimo, nokwategelelwa lika gongale ishewe mEtiyali lyoshiwike tashiya.

Caption (Pic:  Geingob.jpg): Omuprima Minister Dr Hage Geingob


KuTonateni Shidhudhu

 

LEAVE A REPLY

Please enter your comment!
Please enter your name here