Keetmanshoop a tokola okuhuma komeho

0
181

KEETMANSHOOP – Omingwala odha li tadhi dhengwa mevi mEtitano lya zako, opo etungo lyoUniveristy of Namibia [UNAM] lyomutungilo gwoshinanena li tamekwe. Pethimbo lyokusinda ehala moka oshiputudhilo shopombanbda shaNamibia tashi ka tungwa, Kamsela gwoshikandjohogololo sha Keetmanshoop Urban, Hilma Nikanor, okwa ti kutya omatungo goongeshetha omape, omatungo goombelewa dhUuministeri wiikwamaliwa, omatala omape nosho tuu ombelewa yopashitopolwa yUuministeri yiinima yomegumbo oyo gamwe gomomitungilo ominene ndhoka dha longitha iimaliwa oyindji opo dhi tungwe momudhingoloko na shika osha ningitha lela oshilando shika shokuumbugantu shi kale sha tokola otoko uuna taku popiwa ehumokomeho.

Pahapu dha Nikanor okwa ti  iimaliwa oodola dhoomiliona odhindji odha gandjwa opo dhi longithwe mokuyambula po oshilando shika. Sho osho nduno shi li mondjila kutya aakalimo nosho tuu aaniilonga yalwe yopaumwene, naya mone ko wo kuuwanawa wiilonga mbika. Itandi ti nduno oompito dhiilonga mbika nayilwe nayi gandjwe ashike kaantu yomomudhingoloko nguka, ashike oshi li ashike mondjila kutya, uuna iilonga tayi gandjwa, naku talike tango aantu yomoshitopolwa shika opo oluhepo lu kandulwe po momudhingoloko, Nikanor ta fatulula. Kamsela gwopaitopolwa okwa gwedha ko tati, aanangeshetha noohandimwe oye na ompito onene opo ya likole mo muuwanawa mbuka tashi pitile mokugandja iinima nomayakulo. Okuza ngaa ngashingeyi sigo okiilonga yilwe ya tegelelwa tayi keya.

 

Endiki lyomalandithilo, ndyoka lyomuthika nguka ogwo  gwotango mo Keetmanshoop, otaku tengenekwa tali pu okutungwa muNovemba nuumvo na Nikanor ota ti naalandithi  oyendji oya holola nale nokuli eitulemo lyawo opo ya ka longele mo.Ombelewa yopashitopolwa  yiikwaimaliwa ano yi na sha niithendela  otayi ka egululwa pambelewa MEtine lyoshiwike shika niilonga yokutunga etungo lyombelewa yopashitopolwa yUuministeri wiinima yomegumbo oya tameke nale. Kamsela okwa tegelela omatala  omape, ngoka taga pingene po okandiki taka longo ngaa natango ke li  pokati kondoolopa hoka ka nuninwa aanangeshetha aashona noyopokati, oga tegelelwa ga pwe okutungwa  pehulilo lyaKotoba.

 

Nikanor okwa popi ta ti, ombelewa ye oya pula wo Uuministeri woonzo dhoohi niikwameya (mefuta) opo wu gwedhele ofaalama yoohi yaKeetmanshoop. Opolojeka ndjika yoku muna iikwameya oyi na oohi, iikunino (tayi longitha omeya taga zi momatale goohi) nosho tuu oshikunino shoondjuhwa ndhoka hadhi palutha aantu yomomudhingoloko. “Otandi indile opo Uuministeri gwoonzo dhoohi nodhomomeya (mefuta) opo wu endelele mokugandja iimaliwa opo opolojeka ndjika yi nenepekwe opo tu vule okugandja oompito odhindji kaanamudhingoloko tse tu mone uunongo nontseyo ya pumbiwa opo tu vule okusindanitha opolojeka ndjika”, Nikanor ta gwedha ko.

 

Nonando puna ngaa aapunguli yamwe taya pungula mondoolopa, Nikanor otati kutya ope  na natango ompumbwe yiilonga yokunduluka ano yoofabulika, adhihe oonshona noonene. Okwa zimine wo kutya oopolojeka ndhoka aantu ya hala ngaashi oofabulika dhiiyata niiyopaleki [iipundi, oombete, iitaafula nosho tuu] otayi ka eta po oompito dha pumbiwa dhiilonga momudhingoloko nguka gwa dhengwa nayi konkalo yokuhena iilonga, unene tuu aagundjuka. Oshikwawo ishewe, okwa tumbula kutya opolojeka yokutunga ondama yaNeckartal otayi ka eta omauwanawa ogendji koshilando shina sha nomagumbo noku eta oompito dhiilonga. Ashike, okwa holola euvonayi lye ketokitho nokumana po ethimbo shina sha nokutula miilonga opolojeka ndjika yongushu yoodola dhaNamibia oobiliona ndatu.Otandi tsikile nokukondja opo ku adhi ke ondondo  ya hugunina ye tameko lyopolojeka ndjika. Osha simana lela okukondja molwa ehumokomeho lyoshilando, oshitopolwa noshilongo shika ashihe, osho a ti.

Omaupyakadhi galwe  ga taalela oshilando ogo, pahapu dha Nikanor, ga kwatela mo okugandja omagumbo, omeya nuundjugo. Ashike, okwa uvaneke kutya ota ka tsikila nokupula natango e ta kwashilipaleke kutya omaupyakadhi ngaka oga kandulwa po, unene tuu momahala ngoka inaaga topolwa nawa momudhingoloko gwetu.


KuEdgar Brandt

 

LEAVE A REPLY

Please enter your comment!
Please enter your name here