Kotokeleleni oonkondo dhaavundakanithi – Nujoma

0
196

WINDHOEK – New Era Publication Corporation (NEPC) ota tsikile nokutangwa kaanapolitika ya simana molwashoka oha nyola nawa oonkundana dhina sha nehumokomeho.

Omukokoli Pelesitende,  He yoshigwana shaNamibia, Tatekulu Ndokotola  Sam Nujoma,  okwa talelepo oombelewa oonene dhoNew Era Publications Coporation (NEPC), okwati okwa fuulwa unene kiilonga yaNEPC sho ta taandelitha ye ta andjanganeke omauyelele kooha adhihe dhoshilongo.

Okuza tuu sho Omukokoli Pelesitende a patululile  oombelewa ndhika mo2005, shika osha li oshikando she shotango okugalukila ko ishewe kehala ndika.

Shoka sha fuula unene Ndokotola Nujoma osho shoka kutya, muule woomvula adhihe ndhoka, oshifokundaneki shika osha kala nokulonga pauvaneko lyasho. Ano sha kala nokulombwela nosho tuu okulonga aantu AaNamibia mwa kwatelwa wo naamboka kaye uvite ko Oshiingilisa. Shika osha hololwa sho omahokololo haga nyolwa go taga fatululwa  momalaka gaavalelwa mo ngaashi , Silozi, Damara/Nama, Oshiwambo no Rukwangali.

“Oombepo dhoonakuvundakanitha otadhi longo nuudhiginini opo dhi piyaganeke aantu, sho osho mu wete kutya otu na oongeleki odhindji dhi li mokati ketu. Onkene, lombweleni aantu nawa,” osho a gunu. Pethimbo tuu ndyoka okwa li wo a nyanyukilwa unene oshifokundaneki oshivalelwamo Kundana shoka oonkundana dhasho adhihe dhi li ashike momalaka ngaka Oshindonga nOshikwanyama.

Omukuluntuwiliki gwoNEPC Ndokotola Audrin Mathe okwa gandja omagano kuNdokotola Nujoma. Omagano ga gandjwa ogo epandja lyotango lyaKundana gwotangotango moka  efano lyomukokoli Pelesitende olyo lya li kombanda. NEPC oha ndulukile New Era iifo omayovi 20 mesiku kehe niifo omayovi 10 yaKundana mEtitano kehe.

 

Ku Tonateni Shidhudhu

LEAVE A REPLY

Please enter your comment!
Please enter your name here