Omulumenhu a yasha ohonda yaye, shi ye mu denga noluko

0
268

WINDHOEK – Omulumenhu Nghuuduvali Mwelihanyeka okwa yasha ohonda yaye lwoikando ivali, eshi ye mu denga noluko lokutekelifa oshifima.

Mwelihanyeka, weedula 61, okwa lombwela oshikundaneki eshi kutya okwa kala nokaadona kaye Ngame Ndeshideliya meumbo lavo, nove na ondingosho i li poupepepi neumbo lavi molukanda Ombili li li moKatutura.

Oshivike sha dja ko, Ndeshideliya okwe ya ta pula Mwelihanyeka oimaliwa ei ya landifwa mEtine.  Mwelihanyeka ta nyamukula Ndeshideliya kutya oye a kufa mo oimaliwa ei ya landifilwe.

Ova tameka ku tanguna, Ndeshideliya ta vakula oluko nokudenga Mwelihanyeka.

Mwelihanyeka okwa dengwaadengwa kokwooko nomomutwe. Otaku ti, okwa kambuka eshi a dengwa unene.

 

Mwelihanyeka, omunambelewa wopolifi e li moshipundi shetulumuko, okwa yasha Ngame Ndeshideliya lwoikando ivali, pombada yedimo nokoshi yevele. Ndeshideliya okwa tambulwa moshipangelo moVenduka omo ta pewa ouhaku.

Mwelihanyeka natango ta lombwele Kundana kutya, okwa umba omupaulilo mombada, opo e laamene, ashike ina didilika apa a yasha ohonda ya ye yomukainhu.

Mwelihanyeka okwa kwatelwe po Etitano nokwa holokele momangu yaMangestrata waKatutura oshivike eshi, e ya moihokolola nomutwe wa dingaelwa omalapi nokambidja ke yadi omashishilila eehonde.

Mokuleshwa kwehokololo, ota pangulilwa onghendabala yedipao netwomhinge noveta yomahepeko.

Mwelihanyeka ina pitikwa ei kulile modolongo, omo ta kala fiyo okomafiku 11 Okotoba nota ninge eindilo lomukalelipo wopaveta.


KuTunomukwathi Asino

 

LEAVE A REPLY

Please enter your comment!
Please enter your name here