Oshihakanwa shedipao lopaulunde sha pakwa

0
200

TSUMEB –  Omahodi okwali taa pomhodoka momesho ovakwapata, ookaume novatondokinghuwo vanakufya omunamido omilongo 34, Isabela Epampa Eixas,  oo a pakelwe mondoolopa   yavo omo a kulila moTsumeb , ehuliloshivike ladja ko.

Oo ali ta monika a teka omukumo neenghono Omufita Frans  Nawatiseb woEvangelical Lutheran Church in Namibia (ELCIN) , okwati  otashi  piyaaneke nokuudifa nayi okudidilika kutya omuvalu weefiye moshilongo otau londo pombanda neenghono , sha etifwa  eshi ounona vahapu tava fsaala po vehena ovadali  omolwominyonena domomaumbo odo da yukilila unene oomeme nounona.

Eixas okwali a dipawa edipao li nyanyalifa eshi vati  omushamane waye oo a nyika oshiponga,  Buta Epamba  e mu kutuna omunino noshimbele shomokombifa koRundu oshivike sha djako , osho sha talika ko kutya edipao eli ola etifwa kondumbo yokukala mohole ya kwata moiti.

Oshiningwanima eshi vati okwali shii neenghono molwaasho opwa tikila ohonde ihapu unene, mutima utye  omokatomeno koimuna. Eixas okwa hangika mokombifa yaye kovapolifi tadi ohonde neenghono,  osho sha etifa efyo laye.

Ovakwapata vaye ova anya kutya Eixas okwa ya moihulo nomunhu umwe,  osho tashi  tongwa komusamane waye oo  mopaife eli konima yekumba a teelela a ka pangulwemolwa edipao eli.

Ponhele yaasho , eedjo dimwe oda yandja ouyelele kutya Epamba okwa tembuka mo meumbo lavo ndee taka dalifa omukainhu umwe vali,  womondoolopa oyo.

Omufita Nowatiseb okwa ti ovalumenhu ovena oshinakuwanifwa sha kula shokufila oshisho ovakulukadi nounona vavo, na  kavena  okulihumbata  nomikalo odo itaadi tu kumwe neudafano  omo va tulwa kumwe  kohombo.

Okwa ti edipao lameme oleli fa naanaa nenyonaunopo loufemba wounona “ oufemba wokukala nomwenyo” molwaasho oomeme ovena oufemba paveta wokukala nokufila oshisho ounona mounyuni.

“Onakuyiwa oina okukala ili momake ovanyasha, ashike ohatu dulu ngahelipi  okupopya  kombinga yonakuyiwa omanga ounona tava fsaala po kavena ooyina nova nyikifwa oupongo  koilonga  yoohe  ovo ve va dala. Omutima wange owa djuupala unene eshi a fila momake omusamane waye”, Omufita Nawatiseb ta popi nenyeme.

Eedjo dovakwapata oda tonga kutya edipao eli li nyanyalifa noloipundjamenye la ningilwa Eixas , itali tu kumwe noukwatya waye muwa nowefimaneko.

Eedjo dimwe otadi holola vali kutya Eixas okwa hupa nale meenghendambala  mbali dominyonena monghalamwenyo yaye eshi taku tiwa omushamane waye okwemu twa nokumuninga oipute ii kombunda yaye ndee temu hwike nomeva mapyu poitopolwa yopaumwene.

Eixas okwa konga nale ombapila yelombwelo lopolifi yokukaleka po eameno,  ashike kaya li tai keelele Epampa a talele po eumbo lavo okukambandameka omukulukadi waye nounona.

Eixas okandenge kawo a li nale omushikili woshiva wosipana yetanga lopashiwana , Bafana  Subeb, Pule wo Chief Santos na Christantus Subeb, oo naye ali pefudiko olo.

Ina, nakudala Eixas kalipo pefudiko na okwa itavelwa kutya okwa shunine koSouth Africa konima yeedula 25,  a fiile Eixas oo ali omunyashele mefiloshisho la inagona,  ndee ina alukila vali koNamibia fiyo okonena eli.

KuEngel  Nawatiseb

LEAVE A REPLY

Please enter your comment!
Please enter your name here