Savannah ta eta omwenyo nounyenye aushe momusika

0
185

WINDHOEK – OmuNamibia okuyadi, nomudani weengalo omunyasha, Savannah Collin weedula ashike 19, okweli yambula po onga omwiimbi nondaka ayike (omwiimbi woSolo) ta eta omwenyo nounyenye momusika.

Savannah ota ulikile ovapwilikini nghee okudana kwaye kuli pondondo ya kula mounyuni. “Aka okaadona dingi, ko okena shili oshitalenti sha pumba  momusika ,” osho wumwe womwaavo hava longekida omawi okupitila momashina a tonga kombinga yaSavannah.

Eengalo daye oda yooloka da kwatela mo oyo yOshimbulu dingi  ‘Wie is jy’ , “Be free ” nongalo oyo ya kukuta yohole opo ya piti ‘I‘m gone’. Ondaka ya Savannah ohayi kwelengedja yi uditike nawa, ounongo woshiketala uli pombanda neholokepo laye oha li yandje omwenyo.

Okudja ngoo keengalo odo da kukuta dooJimi Hendrix ‘Hey Joe’, wa yuka kwaadi dopokati ngaashi ‘Summer time’, Savannah ote ku shambula ashike omunute oo shamha a londo kokalupanda kokudanena eengalo.

Savannah omunamusika oo eli yambula po ye mwene odalele yaWindhoek, oo a tameka okuimba eengalo omanga ena eedula 16 na  okweshi pondola okuya pondondo yopombanda momusika moshilongo. Mongaha oteli hongo omusika ko College of Performing Arts (COPA) ko Cape Town, oko a kala ta kendambala odula eyi noshiketala shokolusheno,  nokuimba nondaka  keshe moshivike.

Efimbo laye okukala moshilongo ola ngambekwa , ashike  omanga ina shuna kelihongo laye okwa holokele yo  poshivilo shimwe,  osho shotetetete  hashi ifanwa  Viper Bike  Rock ‘n Rally, opo a djoina  eengudu dovaimbi  vovamati  vomoshilongo, novokoSouth Africa.

Eshi ngoo eli tula mokushanga omaimbilo aye, nokukala nookaume noshoyo okuhumifakomesho ounongo waye mongeshefa yomusika Savannah ota dilaadila ngoo oilalakanenwa yaye.

Ota faneke a kale ena onhele yaye mwene yokukwata omawi,nokuliyambulapo yemwene a shiivike nawa moSouth Africa nokombanda yomafuta,  neengalo daye dina omulyo dingi, ye tati okwa pumbwa a longe noudiinini efimbo alishe.

Ita dimbwa nade oshilongo shaye omo a mona enwefemo okukwata oshiketala peedula o14, Savannah omuNamibia  okuna natango ohokwe ya kula yaNamibia.

Tati: “Edina lange, lo olo Edina lokwiimba eengalo,  olo Savannah osho tashi ti eenhele da andjuka nawa da Africa – Ohandi yi nalo keshe opo handi yi – paushili kapena  vali onhele imwe iwa i dule keumbo.’’
KuSelma Shikesho

LEAVE A REPLY

Please enter your comment!
Please enter your name here