Tsandi Academy a fala etanga lyomokambamba kaantu

0
194

…Danielson osho a ningile aanona

TSANDI- Omunamimvo omilongo ndatu okwa kala aluhe ha dhana nawa pamwe nooyakwawo, nopethimbo lye sho ali ha dhanene Ongwediva Robots onga omugameni,Danielson kali a tseyika moku umbila mo etanga lutatu nenge a hwanune ashike owala, aawe. Uunongo we wokudhiladhila tango e ta ningi etokolo lyomondjila lyo lya opala osho sha kala sha simanekitha Namwenyo-omwaanawa nguka mukehe shoka ta ningi nena.

 

Konima sho a toto po oTsandi Basketball Academy okuza mo 2010, Danielson, ngoka e li omulongisikola paithano, okwa longo oshilonga oshiwanawa sho a pe aanona yomoTsandi nomomikunda dhomomudhingoloko ompito ya gamenwa yo ombwaanawa yoku humitha komeho uunongo wawo, omanga taya ilongo iinima yopetameko yankene yena okukala monkalamwenyo tashi pitile moAcademy.

 

Sho a popi na Kundana, Danielson okwa ti mokumona ashike eitulemo lyaanona oyendji yomomikunda dhomomudhingoloko muudhano womokambamba, oAcademy ye oya kutha etokolo opo li fale uudhano popepi naanona mbaka. Konima ashike yethimbo efupi, omasiku ga nuninwa owina omolwa omaudhano nomadheulo otaga ka ningilwa momikunda ndhoka. Omaudhano nomadheulo ga nuninwa owina, otaga ka kala ashike gatsa omuthindo mokulonga aanona kombinga yiinima mbyoka una okutseya tango muudhano womokambamba. Ota ku ka tulwa omuthindo mokulonga omikalo gha nkene una oku kwata etanga , shoka Namwenyo-omwaanawa e wete kutya osho sha simana unene komutameki.

 

Danielson, ngoka e li wo omulongi nenge omupangeli gwookompiuta omathimbo gamwe, okwa ti omathimbo ogendji oha longitha iimaliwa ye mbyoka a  likola okuza mookompiuta opo a gwanithe po oompumbwe dhoAcademy ngaashi omalweendo niikulya yaanona. Okwa indile wo kOmuNamibia- Omunamutimahenda kehe ngoka e na ehalo lyokuyambidhidha opo a kwathele momukalo kehe tuu ngoka ta vulu ndele ha miimaliwa ashike.

 

Omunamimvo omulongo nambali Aune Shileka, gumwe gwomaanona mboka haya idheula esiku kehe po Tsandi Basketball Academy okwa hokololele Kundana shoka a mono mo, ta ti, oha nyanyukilwa aluhe okwiidheula poAcademy na okwiilongo oshindji kombinga yuudhano womokambamba nosho tuu oompango dhawo.

“Omugandjimayele ano Kootja Danielson omuntu omwaanawa noonkondo, ihetu gandagula uuna twa ningi omapuko, aawe, onkene aluhe otuna ashike ethimbo lyoku ilonga. Otwa longwa wo omikalo dha yoolokathana dha nkene tuna oku kwata etanga nankene tatu li gandja ku yakwetu yalwe uuna tatu dhana. Nashika Kootja otati, otashi kwathele okutunga po elongelokumwe mokati kaadhani”. Aune osho a ti. Aune ota ti, ye mwene okwa hala ashike monakuyiwa a ka ninge omulongi ngaashi Omugandjimayele Danielson, ashike, tango okwa hala a kale omudhani gwuudhano womokambamba pondondo yopombanda ye komongula, ta ka kalela po Namibia muudhano kiilongo yopondje.
Ku Otniel Hembapu

LEAVE A REPLY

Please enter your comment!
Please enter your name here