Aakwanezimo ya ninguluka oku tonda omunaulema gwawo

0
196

ONGWEDIVA- Aakwanezimo mboka ya li ya undulile Kamsela gwoshikandjohogololo sha Shikuku Modestus Amutse omunaulema, oya ninguluka noya tokola opo ye mu sile  oshimpwiyu yo yene.

Aakwanezimo oya ninguluka sho Amutse a yi moonkundathana naakwanezimo  yamwe po ,e te ya tseyithile nkene sha simana oku sila oshimpwiyu aantu haa lumbu nuulema wa yooloka.

Kamsela okwa kuutumba naakwanezimo e te ya fatululile kutya, aantu ye na uulema ihaya tondwa ashike, ohaa silwa oshiho pahole yezimo.

“ Shono nda tsakanene nomalenga gopamuthigululwakalo noshowo aakwanezimo otwa zimina kutya na pu kongwe omuntu keshi omukwanezimo opo  ka sile oshiho omunaulema. Ashike gumwe gomaakwanezimo okwa tokola opo a fale omunaulema nguka  kaandjawo oko  aka kale,” Amutse tati.

Omukiintu  gwepipi lyopokati okwiiyamba opo a kale ta sile Pahapu Kazimba omunamimvo 18 oshiho, ngono a valwa iha vulu oku inyenga naanaa kuye mwene. E na uulema mboka ihau penduka nande oha kala ashike a lala. Aakuluntu ye, oya tetekela nale muukwaluhe.  E ta thigwapo na yinakulu ngoka a hulithile ishewe oshiwike mEtitatu lyoshiwike sha ziko.

Kamsela okwa ti, maakwanezimo kapuna nande ogumwe e na ehalo lyoku kwathela ngoka iiyamba oku kala nomuntu nguka e na uulema. Ye ta gwedha ko ishewe kutya megumbo moka tamu ka kala Kazimba, olya pumbwa okugwedhelwa li ningwe enene opo a wape okukala mo nawa. Mushika, Kamsela Amutse, ota indile kaakwashigwana naanangeshefa ya kwathele omwiiyambi nguka.

“ Kwaamboka yena iipeleki noshowo omakwatho gi ili no gi ili andi indile opo ya kwathele omukiintu nguka a tokola okulonga oshilonga oshiwanawa. Iha mono iiyemo yopashimaliwa na ishewe okuna okanona kamwe,” Kamsela a lombwele Kundana.

Kamsela okwa ti omwiiyambi ota ka sila omuanulema oshimpwiyu okuza mulyotango lyaOctober nuumvo.

Pakukwatathana nomupeha gwamwene gwomukunda Oshitutuma, mUukwambi mOshitopolwa shOmusati, oshiwike sha ziko ,Paulus Tshaanika okwa ti, onkalo oya nkundipala lela noonkondo molwashoka mezimo alihe kamuna omuntu ngoka ta vulu oku kala nomuntu nguka ena uulema.

Tshaanika okwa ti egumbo lya nakusa moka muna omunaulema nguka ngashingeyi, olya thigululwapo komumwayinamati omunasikola pOshitutuma. Ashike, ita vulu nando okusila mumwayina oshimpwiyu, unene tuu kutya ota pumbwa lela esiloshimpwiyu lya gwana.

Omupeha gwa mwene gwomukunda okwa ti, okwa hala ngoka eshi omandiki haga ungaunga naantu yena uulema giileko omukadhona nguka oshoka ota ka mona iihuna noonkondo.

 

Ku Loide Jason

 

LEAVE A REPLY

Please enter your comment!
Please enter your name here