Aanuulema taye shi iningile mokapale kuudhano

0
178

OSHAKATI – Omathigathano guudhano waantu mboka ye na uulema oga ningilwe pOkapale komaudhano kemanguluko mOshakati [Oshakati Independence Stadium] mOlyomakaya ga piti nenenedhiladhilo lyuudhano olya li “Aanuulema otaa vulu okuhuma komeho tashi pitile muudhano”.

Uudhano mbuka owa kalelwe kaadhani ya adha lwopo 300, kwa gwedhwa aaiyambi nosho tuu aanambelewa yaza kIitopolwa ayihe 13.Omathigathano oga ningilwe momaudhano ga yooloka ngaashi okumatuka, otennis yoposhitaafula, otennis yoyene, ondjundo, uudhano womokambamba waambo yeli muutemba nosho tuu oku umba egonga, omangonga omanene nuudhano wulwe womeni lyokapale.

Iitopolwa ya yooloka oye shi pondola okumona omapapa ga yoolokathana noshitopolwa shoka sha sindana epapa lyOshitopolwa oshiwanawa osho Oshana. Iitopolwa itatu Omusati, Khomas nErongo, kehe shimwe osha sindana ekopi nomapapa galwe omanga Ohangwena na Kavango nayo yeshi pondola ngaa okumona omapapa.

Ngavena woshitopolwa oshinene shOshana, Omusimanekwa Klemens Kashuupulwa, okwa pandula aalongekidhi yuudhano mbuka sho ya longitha nawa omadhiladhilo e taya eta po uudhano wondondo ya simana ngeyi tayi kutha po ondhino nomutya-nayi kombinga yaanuulema. Uudhano tawu kwathele opo aantu mboka ye na omadhiladhilo go kutya uulema owa faathana nokuhaa vula/pondola sha yega lundulule. Shika ota shi etitha opo kehe gumwe a dhimbulule kutya, uulema wokolutu itawu imbi wu longe nawa e to adha omalalakano omawanawa moonkalo adhihe.

Okwa gwedha ko ishewe ta ti, aalongekidhi naaunganeki oyendji yomaudhano taga longekidhilwa aantu yena uulema, otashi holola kutya aanuulema otaya vulu okulonga oshindji mehumitho-komeho pankalathano nopaliko lyoshilongo shetu. Taye shi ningi naanaa ngashi hashi ningwa kaantu mboka yaana uulema.

Kashuupulwa ta tsikile nokutsa omukumo aantu yena uulema opo ya kuthe ombinga pamwe naakuluntu nosho wo aasilishimpwiyu yawo naantu ayehe muudhano hawu longekidhwa kOshana Heroes Sport Club. Ta indile wo aantu ayehe opo ya yambidhidhe mboka ya hala oku kutha ombinga.

Pehulilo lyuudhano, Omunashipundi gwOshana Heroes Sports Club, Hafeni Mtembi okwa pandula ayehe mboka ya kwathela opo uudhano mbuka wu sindane. Olupandu olunene lwa gwandjwa komuyambidhidhi omunene a kala mOngwediva -Consulting Services Africa nosho wo aayambidhidhi yalwe ngaashi aaiyambi yokukwathela aanuulema.


Ku Nuusita  Ashipala

LEAVE A REPLY

Please enter your comment!
Please enter your name here