Edhindo lyiinyolwa: Tangitangi sho we tu taamba ko nawa

0
221

 Shika oshikando oshitine sho Kundana a nyanyangidhwa. Eeno, otu shi shi nawa kutya olweendo lwoku ku kundaneka oonkundana dha za momudhingoloko gwoye nomoshilongo ashihe, kombinga yiinima yi na sha nuuhupilo, elongo, ontseyo yonkalathano, omainyanyudho, omaudhano nosho tuu yilwe ya guma unene komutima gwoye, opo ashike talu tameke. Miinyanyangidhwa ine ya piti, otwe ku etele mo omahokololo gokOshikango hono kwa li oongonyo tadhi topa, twe ku tseyithila nkene aagundjuka taya humithwa komeho moTsandi okupitila moopolohalama oombwanawa, inatu dhimbwa ko ehumokomeho moKeetmanshoop. Otwa kundaneke oku za konyala moshitopolwa kehe shoshilongo shetu. Shika itashi ti otwa adha kethikilo. Aawe, otatu pula natango komeho, tu li molweendo lwokuhumitha komeho nokugandja omauyelele apehe, sho osho nduno tatu indile, kehe ngoka wa kunda omulombo momudhingoloko gwoye, u tu kundaneke.

Nduka olweendo lwetweni- aaleshi naatseyithi yomalanditho- na otwa pandula unene komayambidhidho geni. Muule ashike womasiku gaali sho epandja lyaKundana lya totwa ko”Facebook”, aantu ye thike lwopo 2000 oya holola ohokwe kulyo noyiinyolitha. Katuna iitya ya gwana oku mu pandula molwa omayambidhidho geni nosho tuu omukumo mwe tu pe pethimbo lyootundi dhopetameko lyoshifokundaneki shika.

Ekuthombinga lyaantu ayehe sigo okonena, ota li tu pe omukumo. Oongodhi tadhi dhengwa nomatumwalaka taga tumwa okupitila mokompiuta nosho tuu oku nyola iinyola kepandja lyo”Facebook” otwe yi pandula, e ta tu ti: tsikileni natango.  Nesimaneko enene otatu mu hehela opo mu kale pamwe natse, neifupipiko otatu mu indile mu tu tseyithile meukililo. Mpoka twa longa onkudhu , tu ulikila po.

Euvaneko ongunga, onkene otwa hala okuuvaneka kutya otatu ke ku pulakena nawa, na uuna twa gandja omulombo hagwo kombinga yontumba, epuko ndika otali ka opalekwa. Sha simana osho  shika  kutya , pwaana omaongaongo, otatu ki iyutha komuthika gwelaka gwondondo yopombanda. Otu shishi kutya otashi vulika twe ku uvitha nayi mpaka naampeyaka, pamwe, etumbulo inali ngongwa nawa nenge iityalupe, iityalonga niityadhina ya vundakanithwa nenge ya topolwa.

Hasho tashi kala ngaaka, nokuli ngaashi naanaa omuleshi gwashili gumwe gwa Kundana a nyola ko”Facebook” tati; “Kewiliko esimanekwa! Nde  mu pandula, Johnny Whiteman Martin. Tse otatu talulula oonkondo dhetu, twi itula muunongo woku endekulula elaka, onkene twi igandja opo tu ningithe Kundana oshifokundaneki shOshiwambo dhingi”.

 

Aaleli aasimanekwa oyendji oya tumbaleke epandja ndika- epandja etiyali- okuza tuu sho Kundana a totwa. Nonando oya gandja omapandulo, oya gunu wo opo tu longe, tu nyanyudhe e tatu kundaneke aantu ayehe. Okuza ngaa kOmukokoli Pelesitende, He yoshigwana shaNamibia, Tatekulu Ndohotola Sam Shafiishuna Nujoma (ngoka efano lye lya li kepandja lyotango moshinyanyangidhwa shotangotango), naPelesitende gwoshilongo yemwene Omusimanekwa Tatekulu Hifikepunye Pohamba okwa gandja etumba kepandja ndika niitya yetsomukumumo (kegonga nakuye oshigongoti molwaashoka efano lye lya dhimbiwa moshinyanyangidhwa oshititatu, ashike iitya oya nyolelwe ngaa), Minista yOmauyelele nOmakwatathano, Joel Kaapanda naNgavena gwoshitopolwa Oshana Clemens Kashuupulwa.

Otashi ka kala endopo enene megandjo lyomayakulo uuna inatu longa pauvathano lyetu lyokulonga, lyokundungika nokunongeka. Onkene, natu pandule omuleshi gwashili gwoko “Facebook”, Johnny Whiteman Martin nooyakwawo yalwe, mbono ya kala nokwiitula mo noonkondo mokulesha oshinyanyangidhwa nehokololo kehe, yo taya kutha wo ethimbo opo ye tu hololele omanyanyu nomauvonayi, kombinga yiilonga yetu. Shoka, oshi li naanaa mondjila. Omuleshi kundana!

 

Omudhindi

LEAVE A REPLY

Please enter your comment!
Please enter your name here