Ka umbaumba kalya omutse gwokadhila

0
201

Nairobi- Nghee ngoo a dja okutameka  pondondo yopedulela, mokapale ketanga keyadi ondwi  molukanda  laNgwediva popepi nOshakati moshitukulwa sha andjuka nawa shaShana, omudani mukulu ali ha dana pokati Willem Mweshihange,  a shiivika nawa nedina Dudes kovayambididi vaye  momaudano etanga, ota humu komesho okuya pondondo yopombanda.

Omunamido omilongo 27, ena oukwatya muwa, oo ha dana ongomukeeleli wetanga   nokwa kalifa oshipana yoTigers  pamufika noya ngungila. Ina mona nande onale omhito yokukufa ombinga momakondjifafano omaudano opombanda, ile a hoololwe yoo nande omeengudu domaudano ovanyasha pashiwana fiyo tuu a djoina oTiger.  Ina hoololwa nande manga ali mosipana yondodo yopedu  oTeenagers FC  oyo ya kwatelwa pamalufe moshipana   yomoshitukulwa shaShana pefimbo lomaudano okomudo  a shiivika nawa Namibian Newspaper Youth Cup.

Kakele koku talikila pondondo yopombanda  kwaava hava hoolola ovadani vopashiwana,  Dudes okwali Kapitiya womaudano etanga lokeemhadi lovanyasha moshitukulwa shaShana (  Oshana Regional Youth Football) ovo va findanene mo2007 moudano wodula keshe woNamibia Newspaper Youth Cup oyo ili koshi yevava lo Namibia Football Association (NFA)

Enyakwa  eli, mokukeelela etanga ola tameka onga omutulimo weekola kuyadi ngaashi tashi ulikwa momaudano a danwa ngeenge osipana yavo tayi dana.

Dudes okwa ninga oshilyo sha fimana shovadani vongundu yetanga yoTisan, nokwa djoina ongundu yomoshilongo yedina Tigers  FC modula 2008,  na okwa holoka tete poluhaela eshi  vali tava dana noshipana yaOrlando Pirate momaudano oliga oo vekelipa mo imwe mu imwe.

Inashi kufa efimbo lile eshi e li monikila kwaava hava hoolola ovadani  vopashiwana nokwa tumbalekwa momaudano oo taa ende nawa moshilongo. A fimanekwa kovadani pamwe naye nokovakondjifi vaye vomoudano eshi a ulika nohokwe elitulemo mokukeelela etanga.

Okuhaninga  omapuko mahapu nokudana kwaye kuli pondodo okwa twa omukumo elelo laTiger  li mupe oshipundi shouKaputeyina  konima yeedula mbali eshi a djoina  ongudu ikulukulu yetanga moshilongo.

Dudes, okwa li umwe womovadani dingi eshi a danene lwotete nosipana yoBrave Warrior momaudano opambili opayiwana mokukondjifa Malawi odula ya dja ko. Namibia okwa findanene moLilongue na okudja kefiku olo,  oshinyolwa keshe shoBrave Warrior shihena edina la Dudes Mwedihanga otashi ka  talika ko shafa inashi lihwapo.

Okwa danene onga omukwatelikumwe  eshi Namibia a danene naMorocco momaudano okulideula pokapale kaRand Stadium moJohannesburg mo2012 nokudana kwaye kwopondondo yopombanda fiku olo , okwa monikile kovashiivi nawa vetanga  ava veu ile okutala.

 

Okootja yaAmazulu Graig Roslee, okwali umwe womovatali vetanga na okwa didilika divadiva omaunyakwa a Dudes na okwa ya meudafano-twokumwe naye opo a danene okalaba yaKwazulu Natal okudja ashike opo.

Oshali ondjodi tayi tu komukeeleli wetanga ou osheshi, eli  etumba la kula kukeshe omudanitanga  opo te uya momaudano opondondo yopombanda noSouth African Professional Soccer League (PSL).

Pefimbo oshinyolwa eshi tashi shangwa , Dudes okwa mona nale omaudano okutameka eli omugoyi, namakwawo eli avali oku kwafela  ovo vehepo noAmazulu moliga yetanga tayi yandje oshimaliwa shiwa  muAfrica.  Okwa li yo  omukwafeli  nande ina dana momaudano oAmazulu, oo  a findana okola imwe monola okukondjifa Morokka Swallows ehuliloshivike la pita – eshi efindano la kula neenghono komukeleli wetanga ha popiwa  nondaka  italala.

“Okutonga oshili, kakwali lela nda kufa ko etanga la fimana fiyo ookaume kange vamwe novaholi vetanga vamwe va lombwela nge kutya ondina oshitalenti shokutwala nge kokule momaudano ngeenge ondeli tula mo”. Dudes osho a ti.

Okuya kwaye koAmazulu okwa yeulula omivelo  dokalaba eyi yi kute ovadanitanga vakwawo  ovaNamibia vatatu vooPinehas Jacob, Larry Horaeb naSadney Uri-Khob. “Pakutala kapena naanaa eyooloko la kula pokati komaudano etu no  a South Africa. Eyooloko olo li li po oleli ashike kutya omaudano avo okuli pondodo yopombanda novadani vavo ova kufa ko etanga lina oshilonga neenghono.


KuCarlos Kambaekwa

LEAVE A REPLY

Please enter your comment!
Please enter your name here