Kansela ta pula natango komeho

0
312

WINDHOEK – Gumwe gwomaahiki ngalo ka mana nokuli kapyoko moongalo dhopamuthigululwakalo gwAawambo, Simon Uukule, a tseyika nawa nedhina lye moongalo, Kansela, a pititha po ishewe uungalo uyali.

Kansela okwa tseyika nawa koyendji nokangalo ke dhingi, hoka ha ka ithanwa “Omahini”, ka kala taka dhana onkandangala noku mwenyeka mpaka naa mpeyaka moomwedhi dha piti unene tuu mooradio dhOshiwambo, ngaashi Omulunga Radio  no Radio Energy 100 FM.

Ngashingeyi Kansela okwe ya ishewe nomukumo nomatokolo a mana mo, nokwa piti ko nuungalo uyali, “Oshitenya naTumangulula”, mboka tawu nyuwitha omakutsi gaapulakeni mboka ye hole oongalo dhopamuthigululwakalo.

Uungalo mbuka uyali owa pitithilwe oshiwike shazi ko, nongashingeyi Kansela okuli metifa, oku wu topolela kooradio dha yooloka moshilongo ashihe.  Oshitenya, okamwe komuwo hoka ke na etumwalaka tali ndungike aanyasha yo paife opo ya kale ya londoka nokutseya oohedhi dhomuthigululwakalo gwOshiwambo, omanga Tumangulula oko keli thimba yi na ongodhi mwaambuka uupe, ke na omukwelengendjo gwoshiketala ta gwiinyenge nawa. Okangalo haka okanuninwa aakwatwa keti mboka ya hala ekwatho, oshoka omugongo wu lilila ogo ngu hagu ku kwiinine, gwo ngu wa lokwa nago ogwo ho endama nagwo. Onkene, oya tothamo Kansela oye a ninge omukwati keti gwawo.

Kansela okwati ye ota pula natango komeho,na ishewe itaka shuna nando ompadhi monima. “ Ngame onde ya noshilundo nondina ohokwe yoku mwenyeka nokugandja etumwalaka unene tuu kaanyasha yoshinanena mboka yi ininga kakombo iilitha kanzi igalula, noya pilamena omithigululwakalo dhawo.  Dha londoka ihadhi yi iita, onkene ote kambadhala sigo oompoka te vulu. Ondi shi shi kutya oongalo ndhika itadhi thigi nando emanya lya londa kekwawo,” Kansela tati neyimemeho.

Nonando okuli monkugo yina onkambe kombinga yoshimaliwa, Kansela ota pumbwa ishewe omuwiliki nomukwateli komeho moongalo dhe. Onkene ota indile neyifupipiko moshigwana kAasamaliya aanamutima-henda opo ye mu yambidhidhe nokashona hoka yena po.

 

Kansela ta gwedhapo ishewe ta tii, momasiku hamale geli komeho, otaka pititha okavidio ka Tumangulula.


Ku Pinehas Nakaziko

LEAVE A REPLY

Please enter your comment!
Please enter your name here