Nakusa Juuso Shikongo a simanekwa pOmuntele

0
290

OMUNTELE: Konima yomimvo omilongombali nambali dha pita sho ali a thigipo uuyuni mbuka, edhina lyomusita gwotango gwegongalo lya ELCIN kOmuntele onkene tali tsikile nokusimanekwa omolwa iilonga mbyoka a longele oshigwana shokomukunda ngoka. Shika osha li sha ningwa mEtitano lyoshiwike sha ziko, sho aantu omathele yali ya gongala pepatululo pambelewa lyosekundosikola ompe kOmuntele mOshitopolwa shaShikoto.

Omusita Juuso Niilonga yaShikongo oye omusita omukokoli gwegongalo Omuntele ngoka a manene oondjenda dhe momumvo 1991. Shikongo okwali a tseyika nawa miilonga yongerki ya ELOC (ngashingeyi ELCIN) unene tuu mOmuntele nomomikunda dhopuushiinda omolwa iilonga ye yondjungu, kaayishi owala yokutaandelekitha evaangeli ashike nokuyambulapo woo ooprograma dhehumokomeho moshitopolwa.

Shika oshali ihe sha etitha etokolo kaakomeho yopashikandjohogololo shOmuntele opo osikola yopombanda yi lukilwe omusita nakusa Juuso Shikongo. Kwaashoka sha popiwa kuKansela gwoshikandjohogololo Omuntele, Omusimanekwa Sakeus Nangula,  omadhina ogendji oga li ga gandjwa kokomitiye ompitithi yoshikandjo onga omadhiladhilo gedhina ndyoka osikola ompe yina okulukwa. Konima yoonkundathana dhomuule nokutala koondjokonona dhomadhina gaamboka gali ga gandjwa, okomitiye oya li yatsu kumwe yi lukile omusita nakusa Juuso Shikongo osikola ndjoka. Nangula okwati kapuna ngoka ta patana kutya omukunda Omuntele ogwa humukomeho omolwa iilonga yondjungu yanakusa Shikongo, te mu hokolola wo onga omwiitaali gwashili, ependafule lyekondjelomanguluko nomunalukeno gwoshigwana.

Poshiithanene opwali pwa kalwa kaanenentu oyendji mwa kwatelwa Ominista yelongo Omusimanekwa David Namwandi, Ngoloneya gwaShikoto Omusimanekwa Penda yaNdakolo, Omuwiliki gwelongo moshitopolwa Lamek Kafidi, aasitagongalo, aakuluntusikola naanangeshefa oyendji, gumwe gomuyo omusamane Nico Kaiyamo ngoka eli kansela gwotango gwoshikandjohogololo shaShomeya (Tsumeb).

Aapopi ya yooloka oya li ya popi nokutanga omusita Juuso Shikongo, noyali wo ya pandula aakomeho moshikandjohogololo Omuntele shoya tokola okulukila omusita Juuso Shikongo osikola. Oshipopiwa shomumbiisofi gwaELCIN mOshikandjongerki shokuuziko Omundohotola Shekutamba Vaino Nambala osha li sha thikithwa komusita Isai Iipito, ngoka ali a gandja ondjokonona yankene egongalo Omuntele lyali lya tototwa po momumvo 1964, noshowo etotepo lyosikola momukunda ngoka guli popepi nekango lyomongwa.

Dr Nambala okwa ti Omuntele ogwa dhana onkandangala ya simana mekondjelomanguluko lyoshilongo, nopethimbo lyiita yalula, Omusita Shikongo okwa kala noku kwathela aakwiita yoPLAN opo ya longe iilonga yawo.  Okwati ondjokonona yOmuntele oya pumbwa oku shangwa nawa opo yi tseyike, ta indile epangelo opo li yambidhidhe mokunyola ondjokonona yomukunda ngoka. Nambala okwa tala ko etotepo lyosekundosikola pOmuntele onga eitulemo nesimaneko kepangelo kutya Omuntele ogwa longa iilonga ya simana kemanguluko lyoshilongo, na ota shi kala sho opalela opo aanona yomomudhingokolo ngoka yalye iiyimati yemanguluko pamukalo gwelongo ewanawa, lyongushu noli li popepi nayo.

Gumwe gomoyana yanakusa Shikongo, omusamane Juuso Panduleni Shikongo okwali a popi peha lyaakwanezimo yomusita Juuso Shikongo, nokwali wo a longitha ompito a kwate Mbushe. Omusamane Pandu yaShikongo okwati he okwa li a mono iihuna komake gaakolonyeki pethimbo ndyo, nomomumvo 1981 nakusa Shikongo okwa li a kwatwa po komakakunya molwaashoka a tindi okulongela kumwe nongundu yoDTA, ta falwa kondholongo hoka a kala uule woomwedhi omugoyi.  Nakusa Shikongo kali eholike koombulu unene tuu molwa oyana yahamano mboka yali ya thigi po oshilongo nokuya muupongekwa oku ka kondjela emanguluko.

Ashike nonande a kala noku monithwa iihuna, sho a galuka kondholongo, nakusa Shikongo okwa tsikile nokulonga iilonga ye ngaashi shito, nokwali a pondola oku kaleka po ombili nuukumwe mokati kaakwashigwana yomomudhingoloko Omuntele.  Okwa hokololwa wo a dhana onkandangala onene moku eta omunino gwomeya ga yela okuza kOkatope sigo okuAmbende. Omunino ngoka sigo onena ogwa gandja omauwanawa ogendji kaakwashigwana oyendji mboka ya kala nokuteka omeya momithima nomomatope.

Aakwanezimo oya li ihe ya pandula epangelo sho lya simaneke iilonga yahe, noya li ya kwata Mbushe yahe niilongitho yoompumbwe dhosikola moka mwa kwatelwa yimwepo yopaunongononi yina ongushu N$20 000, noshowo otyeke yoshimaliwa N$10 000.00. Aanashituthi yalwe oya li ya gandja iinima kosikola yongushu N$46 000.00 niimaliwa yaadha N$70 900.

Pokati mpoka otwa kundana kutya ombelewa yelongo moshitopolwa shaShikoto okwa li yalongitha oshimaliwa mokufuta onkulungu yimwe yomOvenduka opo yi honge ethanomanya  lyomusita nakusa Juuso Shikongo. Oshihongomwathano osha li shina oku dhikwa mosikola ndyoka yemu lukilwa nokwali wo shina okusiikululwa esiku osikola ya patululwa. Aakwanezimo oya li ya ithanwa yaka tale oshihongomwathano shoka, nomokushitala oya li ya tindi oshihongomwathano shoka taya ti kutya inashi ningwa nande shafa tate gwawo. Natango ina shi tseyika kutya iimaliwa ingapi yali ya futwa onkulungu ndjoka, ashike ota ku popiwa kutya iilonga ota yi ka gandjwa po konkulungu yimwe opo emanya li kale lya dhikwa mosikola omumvo tagu ya.


Ku Tonateni Shidhudhu

 

LEAVE A REPLY

Please enter your comment!
Please enter your name here