Ohauto yoMercedes ya nyanyagula omukokele miipambu, e tayi fadhuka po nokwaako kwaNakusa

0
307

WINDHOEK – Aanamukunda gwaNkandu natango otaya nyengwa okutaamba ko noku uva ko edhipago lyomukokele ngoka a nyanyagulwa miipambu kohauto yomuhingi omugundjuka. Oshiponga osha ningwa uusiku, sho omulumentu omukokele, a li ta taaguluka ondjila. Olutu lwe olwa nyanyagulwa po nokwaako kwe kumwe okwa patekene mohauto ndjoka yi idhenge muye.

Omuhingi Mukuve Placidius ina thikama sho a dhimbulula kutya ohauto ye oya guma omuntu, aawe, okwa hingi e ta matuka po ishewe sigo okegumbo lye ndyoka li li uule wookilometa 100 okuza pehala lyoshiponga. Okwa ndopa ishewe okwiilopota yemwene kopolisi pethimbo. Nesiku lya ka landula sho opolisi ya li tayi ningi omakonaakono kohauto ye, oya adha ko oshipambu shokwaako sha patekena.  Placidius okwa mangwa po meendelelo. “Omuhingi okwa nyanyagula meendelelo omweendi gwokolupadhi”, Opolisi yaRundu osho ya tseyitha oshiwike shika. Omukokele ngoka kwa tseyithwa kutya okwa hulithile oondjenda dhe pehala mpoka, oye Johannes Nsamba a li e na oomvula 60.

Nonando uuyelele inawu yela naanaa, ehokololo lyopolisi otali ti kutya Placidius omunamimvo 36 okwa li ta hingilile ohauto ye ombwaanawa ombulau oMercedes Benz C-Class, ndyoka ya etitha olutu lwanakusa lu tetagulwe miintimbu. Oshiponga osha ningilwa mondjila onene pokati kaNkurenkuru naRundu muusiku wOlyomakaya 14 September, lwopotundi 21:00.

Shoka sha ningitha oshiponga shika shi kale oshiwinayi unene sho tashi limbilike osho shoka kutya Placidius ina thikama konima yoshiponga ashike, okwa tsikile nokuhinga uule wookilometa 100 sigo a thiki pegumbo lye moRundu. Opolisi otayi fekele kutya Placidius, ngoka a li koNkurenkuru mehuliloshiwike, pethimbo lyoshiponga okwa li a kolwa.

Nonando oshiponga osha ningilwe lwopotundi 21:00, Placidius okwe ki ilopota ashike kopolisi mokati kuusiku. Omahokololo otaga ti kutya opolisi oye ya ngaa okukonakona ohauto uusiku mboka ashike, molwashoka okwa li kwa luudha inaya vula okukonakona nawa. Ongula yesiku lya landula, sho opolisi ye ya ishewe okuninga nawa omakonakono, oya mono meni lyoMerceddes-Benz okwaako kwa Nakusa Nsamba.

“Omuhingi ina thikama po pehala lyoshiponga, ashike okwe ki ilopota uusiku popolisi yaRundu,” Komishina gwOpevi Willi Bampton, omukwatakanithi momakonakono gomiyonena mOshitopolwa shaKavango osho a ti.

Placidius okwa pangulwa oshikando shotango mompangu yaMangesitalata gwaRundu oshiwike shika. E ta pulwa a fute oodola dhaNamibia 1,500 opo a ze mo mondholongo. Na ishewe okwa tegelelwa aka pangulwe muNovemba nuumvo.

Oshipambu shokwaako shoka sha adhikile mohauto, osha falwa kehala lyomidhimba. Komishina gwOpevi okwa dhega ko ta ti, ita vulu okupopya kutya okwaako okwo kombinga yokolulyo nenge okolumoho.

 

Ku Tunomukwathi Asino

LEAVE A REPLY

Please enter your comment!
Please enter your name here