Oombepo dhuulodhi tadhi hepeke Iyambo

0
300

OSHAKATI – Alma Iyambo, 45, gwomEsati Lyombinda mOshikandjohogololo shUukwiyu-Ushona ota piyaganekwa nayi megumbo lye koombepo dhuulodhi okuza mo 2011. Iyambo oye omuvalwa awike maamwayina e na omwenyo, oye wo yina yaanona yane, aakadhona yaali naamati yaali.

Pahokolo lyaIyambo, iilonga mbika oya tamekele niilya yomahangu tayi kana pokapale nopwaana kutya olye e yi kutha po. Sho tashi tsikile ndun tashi yi keshisha, lago enene, pethimbo ndyoka kamwa li muna iilya. Okuza muJuni nuumvo, okanona okakwanezimo koomvula 11 hoka a tekula okuza sho kena omvula noomwedhi hamano, oka tameke taka mono enyolo mokambapila ka tulwa mondjato yako yosikola, miikutu, moombiga nomoondooha dhaana sha megumbo ta li ti, “Ino ya kosikola ngele hasho oto ki imangeleka”. Onkalo ndyika otayi piyaganeke oshoka ihaya mono oonkatu dhoompadhi pevi ndhoka taya vulu ando okulandula opo yam one kutya olye ha tula uumbaapila momahala ga yoolokathana..

Iyambo ota uvithwa nayi unene koonyata nomasita ngoka haya mono olwindji megumbo. Okamati koomvula hamano oka tameke haka penduka aluhe keli mohi yomasita ko ka kundukidhwa koonyata esiku kehe. Konima yomasiku gontumba, Iyambo okwa lundulula okamati, e ka kutha mondunda ndjoka haka lala nooyakwawo e te ka fala kondunda yilwe. Ashike, shika inashi eta po elunduluko, nokuli osha etitha owala uudhigu kokanona kamwe ishewe hoka ka tameke wo keli mohi yomasita nokumona oonyata uuna taka penduka. Shika osha etitha opo Iyambo a kale ha lala pamwe naanona ayehe mondunda yimwe. Ohaluka ishewe esiku limwe, Iyambo yemwene okwi iyadha mohi yomasita noonyata.

Oshikando shimwe okwa li a fala iilya opo yi ka tsuwe keshina, okwa dhimbulula kutya oya nonga mo iishona mehemele. Sho a tsitha, okwa futithwa oodola dhaNamibia 7-00 pehala lyokufuta oodola dhaNamibia 10-00. Pomathimbo gamwe, aanona ohaya adha wo omasita noonyata dhi li mombiga moka yina heya thigile iikulya uuna a ka teka omeya.

Sho a pulwa opo  a tye ko sha kehokololo, Kansela gwoshikandjohogololo , Andreas Amundjindi okwa ti okwa lombwelelwe ngaa kombinga yonkalo ndjika na okwa yile nokuli kegumbo ndyoka e teya kwathele niikulya. Amundjindi ota indile komahangano agehe kageshi gepangelo opo ga kwathele aanegumbo ndika naashoka taga vulu. Ta indile wo oongeleki opo dhi kuthe ombinga moku ya galikanena. Iyambo ota lili uuthigona we koshigwana opo shi mu kwathele uumbiga, omakumbatha, iikulya niimaliwa. Ngele ope na OmuNamibia omunamutima-henda ngoka a hala oku kwathela , na kwatathane na Alma Iyambo konomola yongodhi 0812005310.


Ku Nuusita Ashipala

LEAVE A REPLY

Please enter your comment!
Please enter your name here